سعودی ولی عہد شہزادہ محمد بن سلمان کی 10 سے 15 مئی کے دوران پاکستان آمد متوقع ہے۔ وزیراعظم شہباز شریف نے ورلڈ اکنامک فورم کے موقع پر سعودی عرب کے ولی عہد اور وزیراعظم محمد بن سلمان آل سعود کو دورہ پاکستان کی دعوت تھی۔
سعودی ولی عہد کا دورہ پاکستان نہایت اہمیت کا حامل ہوگا۔ ان کے اس دورے کے دوران دونوں ملکوں کے درمیان اہم تجارتی اور سرمایہ کاری معاہدوں پر دستخط کیے جانے کا امکان ہے۔ ایس آئی ایف سی (SIFC) کے تحت طے پانے والے معاہدوں سے پاکستان اور سعودی عرب کی دوستی میں ایک نئے باب کا آغاز ہوگا۔
گزشتہ ڈیڑھ ماہ میں سعودی عرب اور پاکستان کے اعلیٰ سطح کے وفود نے بالترتیب پاکستان اور سعودی عرب میں ملاقاتیں کیں۔ ان ملاقتوں کا اصل مقصد دونوں ممالک کے درمیان سرمایہ کاری کو فروغ دینا اور ضرورت کے وقت باہمی تعاون کو یقینی بنانا ہے
سعودی وفد کی قیادت نائب وزیر برائے سرمایہ کاری ابراہیم المبارک نے کی جن کے ساتھ مختلف شعبوں سے منسلک کم و بیش 30 سرکاری و نجی کمپنیوں کے عہدیداران شامل تھے۔ پاکستان کی جانب سے وزارت توانائی و پیٹرولیم نے وفد کی میزبانی کی اور ایس آئی ایف سی کے عہدیداران نے خصوصی معاونت کی۔
اس فورم کا اہم حصہ سعودی اور پاکستانی سرمایہ کاروں کے مابین B2B مذاکرات تھے جن میں مختلف شعبوں سے منسلک پاکستانی تاجروں نے سعودی سرمایہ کاروں کو اپنی کمپنیوں سے متعلق بریفنگ دی اور سرمایہ کاری کے مواقع سے آگاہ کیا۔
سعودی سرمایہ کاروں نے زراعت، توانائی، مائننگ اینڈ منرلز، سیاحت اور آئی ٹی کے شعبوں میں خصوصی دلچسپی ظاہر کی۔ اسی لیے اب امید ظاہر کی جارہی ہے کہ سعودی ولی عہد محمد بن سلمان کے متوقع دورہ پاکستان کے دوران اہم معاہدوں پر دستخط کیے جائیں گے۔
