ڈپٹی چیئرمین پلاننگ کمیشن محمد جہانزیب خان کی زیر صدارت سینٹرل ڈویلپمنٹ ورکنگ پارٹی کے اجلاس میں مجموعی طور پر 126 ارب روپے کی لاگت کے 3 منصوبے قومی اقتصادی کونسل کی ایگزیکٹیو کمیٹی یعنی ایکنک کو بھیجنے کی منظوری دی گئی ہے۔
اجلاس میں ٹرانسپورٹ اور مواصلات کے شعبے سے متعلق 2 منصوبے پیش کیے گئے، پہلا منصوبہ 164 کلومیٹر طویل جگلوٹ-اسکردو روڈ ایس 1 کی مرمت اور اپ گریڈیشن کا تھا، جس کی مجموعی لاگت 3327 کروڑ روپے مختص کی گئی ہے، منصوبے کا تفصیلی جائزہ لینے کے بعد منصوبے کو حتمی منظوری کے لیے ایکنک بھجوا دیا گیا۔
سینٹرل ڈویلپمنٹ ورکنگ پارٹی کے اجلاس میں مواصلات کے شعبے سے متعلق 5724 کروڑ روپے سے زائد لاگت کا دوسرا منصوبہ ایشین ڈیولپمنٹ بینک کے فلڈ ایمرجنسی قرض کے تحت مورو سے رنی پور تک این 5 کی بحالی اور خراب پلوں کی تعمیر نو کا پیش کیا گیا، جس کا تفصیلی جائزہ لینے کے بعد ایکنک کو بھجوانے کی سفارش کی گئی ہے۔
اجلاس میں صحت کے شعبے سے متعلق 3541 کروڑ روے سے زائد کی لاگت سے وزیر اعظم کا پروگرام برائے ہیپاٹائٹس سی کے خاتمہ کا پیش کیا گیا جس کا تفصیل سے جائزہ لینے کے بعد حتمی منظوری کے لیے ایک بر پھر ایکنک کو بھیج دیا گیا۔
اجلاس میں سیکریٹری وزارت منصوبہ بندی، اویس منظور سمرا، پلاننگ کمیشن کے ارکان، ایڈیشنل سیکریٹری وزارت منصوبہ بندی کامران رحمان کے علاوہ وفاقی وزارتوں اور صوبائی حکومتوں کے نمائندوں نے بھی شرکت کی۔
