رہنما پاکستان تحریک انصاف رانا شہباز کو پنجاب اسمبلی میں ویڈیو بنانے سے روکے جانے پر ایوان میں ہلڑ مچ گیا اور اپوزیشن اور حکومتی اراکین آمنے سامنے آکر زبردست نعرے بازی میں مشغول ہوگئے۔
مزید پڑھیں
پنجاب اسمبلی کے اجلاس کے دوارن رانا شہباز کی جانب سے ویڈیو سازی پر حکومتی بنچز سے خواتین ارکان نے اعتراض و تنقید کی اور اپنی سیٹوں سے کھڑی ہوگئیں۔ ڈپٹی اسپیکر پنجاب اسمبلی نے رانا شہباز کو ایسا کرنے سے روکتے ہوئے کہا کہ یہ ابھی مناسب نہیں آپ فوٹو سیشن بعد میں کرلیجیے گا۔
ڈپٹی اسپیکر نے یہ بھی کہا کہ ’رانا صاحب یہ آپ ٹھیک نہیں کررہے بیٹھ جائیں، ہاؤس کے وقار کا خیال کریں یہ کوئی طریقہ نہیں ہے‘۔
اس صورتحال پر حکومت و اپوزیشن کے درمیان نعرے بازی کا تبادلہ ہوا اور ڈپٹی سپیکر ہاؤس کو آرڈر میں لانے سے قاصر رہے۔
نعرے بازی کا آغاز ہوتے ہی اپوزیشن ارکان نے ایوان میں بانی پی ٹی آئی کی تصویر والے بینرز بھی لہرانے شروع کردیے اور اپنی نشستوں سے اٹھ کر نعرے بازی کرتے رہے۔ اپوزیشن اراکین نے اسپیکر ڈائس کا بھی گھیراؤ کیا اور بعد ازاں اپوزیشن اراکین باہر راہ داری میں آگئے۔
حکومتی ارکان سمیع اللہ خان اور مجتبیٰ شجاع الرحمن اپوزیشن ارکان کو نشتوں پر بیٹھنے کی کوششیں کرتے رہے۔
اپوزیشن اراکین نے’سارا ٹبر چور‘ کا نعرہ بلند کرنے کے علاوہ قائد ن لیگ میاں محمد نواز شریف کے خلاف بھی نعرے بازی کی۔
