کراچی: شادی کی تقریب میں دلہا دلہن کی کرین میں انوکھی انٹری، ویڈیو وائرل

شادی کا دن یادگاربنانے کی خواہش سب کی ہوتی ہے، دلہا دلہن نہ بھی چاہیں تو دوست اور خاندان کے دیگر افراد شادی کی تقریب کو منفرد بنانے کے لیے اپنی خدمات پیش کرتے نظر آتے ہیں، شادی کی تقریب کو مدتوں یاد رکھے جانے کی خواہش کے تحت شادی کی تقریبات میں دلہا اور دلہن کی منفرد انٹری کا رجحان بھی بڑھتا جارہا ہے۔

سوشل میڈیا پران دنوں ایسی ہی ایک وائرل ویڈیو میں کراچی کے علاقے لیاری میں ہونے والی شادی میں دلہا دلہن کی جانب سے اپنے ’ریڈ لیٹر ڈے‘ کو یادگار بنانے کے لیے چونکا دینے کا فیصلہ کیا اور شامیانے میں موجود مہمانوں کے درمیان انٹری کے لیے کچھ اور نہیں بلکہ باقاعدہ ایک کرین کا استعمال کیا۔

وائرل ویڈیو میں دیکھا جاسکتا ہے کہ محلے میں لگائے گئے شادی کے ٹینٹ تک پہنچائے جانے کے لیے دلہا اور دلہن کرین کا انتخاب کرتے ہیں جو سفید چمکیلے کپڑے سے سجایا گیا تھا، ویڈیو میں کرین بجلی کی تاروں اور کھمبوں سے گریز کرتی ہوئی دلہا دلہن کو شادی کی تقریب کے مقام تک لےجاتی نظر آرہی ہے۔

View this post on Instagram

A post shared by karachiwalay (@karachiwalay)

ویڈیو سوشل میڈیا کی زینت بنتے صارفین کی جانب سے ملے جلے ردعمل کا اظہار کیا گیا۔ کسی نے کہا کہ ’تھوڑی سی غلطی اس جوڑے کو سیدھا جنت میں پہنچا دے گی جبکہ کئی صارفین یہ بھی کہتے نظر آئے کہ ایسے عجیب و غریب کام ہمارے ملک میں ہی ہوتے ہیں۔

ایک صارف نے لکھا کہ’بجلی کے کھمبے کے درمیان سے انٹری پر تو شکرانے کے نفل بھی بنتے ہیں‘۔

سماجی رابطوں کی سائیٹ ایکس پر ایک صارف نے منفرد انٹری کی ویڈیو پر تبصرہ کرتے ہوئے لکھا کہ کراچی نئے لوگوں کا شہر نہیں ہے۔

Karachi is not for beginners pic.twitter.com/iY1taPoFl9

— iffi (@iffiViews) May 9, 2024

ایک ایکس صارف نے اس کا موازنہ ترکیہ کے مشہور تاریخی علاقے کیپاڈوسیا میں موجود ہاٹ ایئر بیلون سے کیا اور کہا کہ اگر ترکیہ میں ہاٹ ایئر بیلون ہے تو کراچی میں کرین ہے۔