عالمی شہرت یافتہ فٹبالر کرسٹیانو رونالڈو اور ان کی دیرینہ ساتھی جارجینا روڈریگز بالآخر رشتۂ ازدواج میں منسلک ہوگئے۔ دونوں نے 11 اگست کو پرتگال کے شہر کاسکائس میں ایک نجی اور مختصر سول تقریب میں شادی کی جس میں ان کے پانچ بچے بھی شریک ہوئے۔ جوڑے نے سوشل میڈیا پر شادی کی انگوٹھیوں کی تصویر شیئر کرکے مداحوں کو اس خوشخبری سے آگاہ کیا۔
جارجینا روڈریگز کون ہیں؟
جارجینا روڈریگز ارجنٹائن میں پیدا ہونے والی ہسپانوی ماڈل، سوشل میڈیا شخصیت اور کاروباری خاتون ہیں۔ وہ گزشتہ کئی برس سے رونالڈو کے ساتھ تعلق میں تھیں اور اس دوران انہوں نے فیشن اور سوشل میڈیا کی دنیا میں اپنی الگ شناخت قائم کی۔
یہ بھی پڑھیں: اسٹار فٹبالر کرسٹیانو رونالڈو نے جارجینا سے شادی کرلی، سوشل میڈیا پر کیا پیغام دیا؟
جارجینا اور رونالڈو کی ملاقات میڈرڈ میں اس وقت ہوئی جب جارجینا ایک لگژری اسٹور میں سیلز اسسٹنٹ کے طور پر کام کرتی تھیں۔ دونوں کی ملاقات 2016 میں ہوئی اور بعد ازاں ان کا تعلق مضبوط ہوتا گیا۔
جارجینا نے اپنی زندگی کے مختلف پہلوؤں کو نیٹ فلکس کی دستاویزی سیریز ’آئی ایم جارجینا‘ کے ذریعے بھی مداحوں کے سامنے پیش کیا جس میں ان کے معمولات، خاندان اور رونالڈو کے ساتھ تعلق کی جھلکیاں دکھائی گئیں۔
رقص سے ماڈلنگ تک
جارجینا کو بچپن ہی سے رقص کا شوق تھا اور انہوں نے بیلے کی تربیت بھی حاصل کی۔ بعد ازاں انہوں نے فیشن کی دنیا میں قدم رکھا اور ماڈلنگ کے ذریعے شہرت حاصل کی۔
یہ بھی پڑھیں: رونالڈو کی شادی کی افواہ پر ہزاروں مداح چرچ پہنچ گئے، اسٹار فٹبالر کا دلچسپ ردِعمل سامنے آگیا
وقت کے ساتھ ساتھ وہ ایک معروف سوشل میڈیا شخصیت بن گئیں اور مختلف عالمی فیشن برانڈز اور میگزینز کے ساتھ کام کیا۔ ماڈلنگ کے علاوہ انہوں نے کاروباری میدان میں بھی قدم رکھا اور اپنی مصنوعات اور فیشن سے متعلق منصوبوں کے ذریعے کاروباری شناخت بنائی۔
رونالڈو کے ساتھ خاندان
رونالڈو اور جارجینا کی دو بیٹیاں، الانا مارٹینا اور بیلا ایسمرالڈا ہیں۔ جارجینا رونالڈو کے دیگر بچوں، کرسٹیانو جونیئر، ایوا اور میٹیو کے ساتھ بھی قریبی تعلق رکھتی ہیں۔
دونوں تقریباً ایک دہائی سے ایک دوسرے کے ساتھ تھے اور اگست 2025 میں اپنی منگنی کا اعلان بھی کیا تھا۔
10 سالہ تعلق کے بعد شادی
طویل عرصے تک ساتھ رہنے کے بعد رونالڈو اور جارجینا نے بالآخر شادی کا فیصلہ کیا۔ 11 اگست 2026 کو پرتگال کے ساحلی شہر کاسکائس میں ہونے والی نجی سول تقریب میں دونوں نے ازدواجی زندگی کا آغاز کیا۔
جوڑے کی جانب سے سوشل میڈیا پر شیئر کی گئی شادی کی انگوٹھیوں کی تصویر نے مداحوں کی توجہ حاصل کی یوں تقریباً ایک دہائی پر محیط ان کے تعلق نے باقاعدہ ازدواجی رشتے کی شکل اختیار کرلی۔
