آزاد کشمیر میں وہی ہو رہا ہے جو مقبوضہ کشمیر میں مودی حکومت کررہی ہے، شیریں مزاری

پاکستان تحریک انصاف کی سابق رہنما شیریں مزاری نے کہا ہے کہ آزاد کشمیر میں اس وقت وہی کچھ ہورہا ہے جو بھارتی وزیر اعظم نریندر مودی کی حکومت مقبوضہ کشمیر میں کررہی ہے۔

اسلام آباد میں میڈیا سے گفتگو کرتے ہوئے سابق وفاقی وزیر برائے انسانی حقوق شیریں مزاری نے کہا کہ حکومت آزاد کشمیر کے عوام کے جائز مطالبات مان لے، اس حد تک ادھر آگ پھیل گئی ہے اور کسی کو اس بارے میں پتا نہیں تھا۔

شیریں مزاری نے کہا کہ آج وزیراعظم شہباز شریف نے آزاد کشمیر کی صورتحال پر ایک ٹوئٹ کی ہے، کیا وہ صرف ٹوئٹ سے کام چلائیں گے، کچھ سنجیدگی کا مظاہرہ کریں۔

رہنما پی ٹی آئی نے کہا کہ اگر حکومت واقعی سنجیدہ ہوتی تو یہ صورتحال نہ ہوتی، اب ہم کشمیریوں کے ساتھ وہی کررہے ہیں جو بھارت کے زیر تسلط کشمیر میں مودی حکومت کشمیریوں کے ساتھ کررہی ہے، حکومت خدا کا خوف کرے، اس طرح کشمیریوں کے ساتھ نہ کرے، سنجیدگی سے ان کے مسائل حل کرے۔

مقبوضہ کشمیر میں مودی حکومت شہریوں کے ساتھ جو کچھ کر رہی ہے وہی آزاد کشمیر میں ہورہا ہے، شیریں مزاری@ShireenMazari1#RightsMovementAJK #AzadKashmir #Muzaffarabad #Kashmir #WENews pic.twitter.com/A4R33amEiN

— WE News (@WENewsPk) May 13, 2024

واضح رہے کہ آزاد کشمیر میں عوامی جوائنٹ ایکشن کمیٹی کی کال پر بجلی بلوں اور آٹے کی قیمت میں کمی کے لیے احتجاج آج چوتھے روز بھی جاری ہے، آزاد کشمیر بھر سے احتجاجی قافلے مظرآباد کی طرف رواں دواں ہیں۔

احتجاجی مظاہرین کا کہنا ہے کہ وہ اپنے مطالبات کے حق میں مظفرآباد میں قانون ساز اسمبلی کے باہر دھرنا دیں گے۔