عبدالعلیم خان کی زیر صدارت نیشنل ہائی وے اتھارٹی کے اجلاس میں اہم شاہراہ منصوبوں سے متعلق متعدد فیصلوں کی منظوری دی گئی۔ اجلاس میں لاہور اور سیالکوٹ کے درمیان 2 رویہ موٹروے کو 3 رویہ بنانے کے منصوبے پر جلد کام شروع کرنے کا فیصلہ کیا گیا۔
مزید پڑھیں: اسلام آباد ہائیکورٹ کی نیشنل ہائی وے اتھارٹی میں ڈیپوٹیشن تعیناتیوں پر شدید تنقید
وفاقی وزیر مواصلات نے ہدایت کی کہ سیالکوٹ سے کھاریاں اور اسلام آباد تک موٹروے کو بھی 3 رویہ بنایا جائے اور منصوبے پر کام تیز کیا جائے۔ انہوں نے واضح کیا کہ آئندہ پاکستان میں کوئی نئی موٹروے 3 لین فی سائیڈ یعنی دوطرفہ 6 لین سے کم تعمیر نہیں کی جائے گی تاکہ مستقبل کی سفری ضروریات کو پورا کیا جا سکے۔
اجلاس میں سیالکوٹ سے راولپنڈی موٹروے منصوبے پر فرنٹیئر ورکس آرگنائزیشن کے اشتراک سے کام تیز کرنے کی ہدایت بھی دی گئی۔ عبدالعلیم خان کے مطابق اس منصوبے کی تکمیل سے موٹروے ایم 2 پر دباؤ کم ہوگا اور لاہور سے اسلام آباد کے سفر میں نمایاں بہتری آئے گی۔ انہوں نے کہا کہ اس منصوبے سے دونوں شہروں کے درمیان فاصلہ قریباً 100 کلومیٹر کم اور سفر کا وقت قریباً ایک گھنٹہ کم ہو جائے گا۔
وفاقی وزیر مواصلات عبدالعلیم خان کی زیر صدارت این ایچ اے اجلاس میں اہم فیصلوں کی منظوری
لاہور, سیالکوٹ 2 لین کی موٹروے کو 3 لین کرنے کے منصوبےپر جلد کام شروع کرنے کا فیصلہ
سیالکوٹ سے کھاریاں اور اسلام آباد موٹر وے بھی تین رویہ بنے گی، کام تیز کرنے ہدایت @AmirSaeedAbbasi pic.twitter.com/DUXmkHOFgC— Media Talk (@mediatalk922) March 11, 2026
اجلاس میں کرتارپور اور ننکانہ صاحب کو موٹرویز کے ساتھ منسلک کرنے کے منصوبے کا بھی جائزہ لیا گیا۔ وفاقی وزیر کے مطابق اس اقدام سے سکھوں کے مقدس شہروں میں مذہبی سیاحت کو فروغ ملے گا اور دنیا بھر سے سکھ کمیونٹی کی پاکستان آمد میں اضافہ ہوگا۔
مزید پڑھیں: استحکام پاکستان پارٹی کے عہدیداران کا باضابطہ اعلان، عبدالعلیم خان صدر مقرر
عبدالعلیم خان نے کہا کہ سیاحوں کی سہولت کے لیے 3، 4 اور 5 اسٹار ہوٹلز اور شاپنگ مالز کی تعمیر بھی متوقع ہے جس کے لیے غیر ملکی سرمایہ کاری حاصل کی جا سکتی ہے۔ انہوں نے این ایچ اے کو یورپ، برطانیہ، کینیڈا اور امریکا میں انویسٹمنٹ روڈ شوز منعقد کرنے کی ہدایت بھی کی۔ ان کا کہنا تھا کہ بہتر مواصلاتی نظام اور سیاحتی سہولیات سے پاکستان کا سافٹ امیج عالمی سطح پر مزید مضبوط ہوگا۔
