متحدہ عرب امارات کے قونصل جنرل بخیت عتیق الرومیتی نے لاڑکانہ میں جدید طرز کے اسپتال اور دادو میں سیلاب متاثرین کے لیے ہاؤسنگ اسکیم کا افتتاح کردیا۔
ہاؤسنگ اسکیم کا افتتاح قونصل جنرل بخیت عتیق الرومیتی نے کیا۔ ان کے ہمراہ ہلال احمر یو اے ای کے جنرل سیکریٹری راشد مبارک المنصوری اوردیگر بھی لوگ بھی موجود تھے۔
مزید پڑھیں
اس موقع پر ہلال احمر یو اے ای کے جنرل سیکریٹری راشد مبارک المنصوری نے کہاکہ اسپتال کی او پی ڈی بلڈنگ کو جدید طرز پر بنایا گیا ہے اور ڈاکٹروں کے لیے ہاسٹل کی عمارت بھی تعمیر کی گئی ہے۔
انہوں نے کہاکہ اسپتال میں مریضوں کا بہترین علاج بلا معاوضہ کیا جائےگا۔ جبکہ سندھ کے سیلاب متاثرین چھت سے محروم ہیں ان کو چھت مہیا کرنا یو اے ای حکومت اپنا فرض سمجھتی ہے۔
راشد مبارک المنصوری نے کہاکہ سیلاب سے متاثرہ خاندانوں کو گھر ملنا ان کا حق ہے جو وہ سیلاب میں کھو چکے تھے، ہاؤسنگ اسکیم کے تحت سیلاب متاثرین ایک بہتر طرز زندگی گزار سکیں گے۔ ہاؤسنگ اسکیم سے متاثرین کی بحالی میں آسانی پیدا ہوپائے گی۔
اس موقع پر قونصل جنرل بخیت عتیق الرومیتی نے کہاکہ متحدہ عرب امارات کی حکومت نے صحت کے سیکٹر میں اسپتال کے قیام کا وعدہ پورا کردیا۔
انہوں نے کہاکہ ہلال احمر پاکستان میں سیلاب متاثرین کی مدد کے علاوہ رمضان میں راشن تقسیم کرنے میں پیش پیش رہتا ہے، ہلال احمر چاہتا ہے پاکستان میں صحت کا نظام بین الاقوامی سطح کی طرح ہو۔
انہوں نے کہاکہ یو اے ای کی حکومت کی جانب سے سندھ کے سیلاب متاثرین کے لیے ہاؤسنگ اسکیم ایک اور تحفہ ہے، متحدہ عرب امارات حکومت پاکستانی عوام کی ہر مشکل سے واقف ہے۔
