بیوٹی کانٹیسٹ میں خواتین کا انتخاب کیسے ہوتا ہے؟ مس پاکستان نے تمام راز کھول دیے

مس پاکستان اریج چوہدری نے عالمی مقابلہ حسن میں خواتین کے انتخاب کے حوالے سے بہت سے رازوں سے پردہ اٹھایا ہے۔

نجی ٹی وی کے پوڈ کاسٹ میں گفتگو کرتے ہوئے مس پاکستان اریج چوہدری نے کہا ہے کہ مس ورلڈ اور مس یونیورس کے لیے مقابلہ حسن میں حصہ لینے والی خواتین کو پہلے ان کے ملکوں میں ہی مقابلہ حسن میں حصہ لینا پڑتا ہے، اگر کوئی خاتون اپنے ملک میں مقابلہ حسن جیت لے تو پھر وہ مس ورلڈ یا مس یونیورس کے لیے مقابلہ حسن میں حصہ لینے کی اہل ہوتی ہے۔

اریج چوہدری کے مطابق پاکستان میں پہلے کوئی ایسا رواج نہیں تھا لیکن اب یہ رواج بڑھ رہا ہے۔ ’بیوٹی پیجنٹس کے بارے میں پاکستانی لوگوں کو کچھ پتا نہیں تھا، لوگ سوچتے
‘تھے کہ یہ صرف خوبصورتی کے بارے میں ہے۔

مقابلہ حسن میں اریج چوہدری کو کیا کاز دیا گیا؟

اریج چوہدری نے کہا کہ مس یونیورس یا مس ورلڈ کا مقابلہ صرف خوبصورتی سے متعلق نہیں ہے، کہ آپ کہیں میں یہ صرف بیوٹی کے بارے میں ہے، میں جاؤں گی اور جیت جاؤں گی، لیکن ایسا نہیں ہے۔

مس ارتھ، مس ایکو کیا کہانی تھی؟

اریج چوہدری سے سوال کیا گیا کہ مس ارتھ، مس ایکو کیا کہانی تھی؟ جواب میں اریج چوہدری نے کہا کہ مس ارتھ دنیا کا تیسرا بڑا بیوٹی پیجنٹ ہے، پہلے نمبر ہر مس یونیورس، دوسرے پر مس ورلڈ ہے، چوتھے نمبر پر مس انٹرنیشنل ہے، مس ارتھ زمین سے متعلق ہے، پیجنٹس اس بنا پر سیلیکٹ ہوں گے کہ انہوں نے زمین کے لیے کیا کیا ہے۔

’مجھے زمین کی گرینری کا کاز دیا گیا، زمین کی گرینری بہت اہمیت رکھتی ہے، آنے والے وقتوں میں اگر زمین کی گرینری نہیں ہوگی تو آپ کے بچے کیسے نشوونما پائیں گے، آپ کی صحت صحیح نہیں ہوگی تو آپ کیسے صحیح رہ سکتے ہیں۔‘

انہوں نے بتایا کہ مس ارتھ کے مقابلوں میں بیوٹی پیجنٹس کو مختلف کردار دیے گئے، کسی کا کردار تھا کہ پلاسٹک نہیں ہونی چاہیے، بس زمین کو محفوظ بنانا ہے۔ ’میں نے بہت سے پودے لگائے، مصر میں بھی پودے لگائے۔‘

ان مقابلوں میں مختصر لباس پہننے کو کہا جاتا ہے، کیا کسی نے غلط مطالبہ کیا؟ اس سوال کے جواب میں مس پاکستان نے کہا ’ ایمان داری سے بتارہی ہوں، میں جتنے بھی بین الاقوامی مقابلوں میں گئی ہوں، کچھ حد تک ایسی چیزیں ہیں لیکن یہ نہیں ہے کہ بین الاقوامی طور پر وہاں پر کوئی ایسا مطالبہ کرے گا، وہاں پر اتنی لڑکیاں آئی ہوتی ہیں، ان کے لیے بڑی بات ہے کہ کوئی لڑکا ان سے کچھ ایسی بات کر دے، وہاں بہت دوستانہ ماحول ہوتا ہے۔‘

غیر مناسب لباس پہننے کی کبھی آفر ہوئی؟

کوئی آفر آئی ہو کہ آپ غیرمناسب لباس پہنیں؟ اس سوال کے جواب میں اریج چوہدری کہا کہ بین الاقوامی طور پر ایسا کبھی نہیں ہوا، لیکن جب وہ مس پاکستان بنی تو انہیں کچھ شوٹ کی آفر ہوئی، یہ آفر کرنے والے کو لگتا ہے کہ جو لڑکیاں مس پاکستان بن جاتی ہیں تو ان کو یہ کرنے کا حق ہوتا ہے، یہ پاکستانی لوگ ہوتے تھے جو یہ آفرز کرتے تھے، اب بھی انسٹاگرام پر باقاعدہ آفرز آتی ہیں۔

کاسٹنگ کاؤچ کو آپ کیسے دیکھتی ہیں؟ اس سوال کے جواب میں انہوں نے کہا کہ کاسٹنگ کاؤچ کا بھی یہی سین ہے کہ انڈسٹری میں اوپر کے لوگ آپ کو اوپر پہنچنے ہی نہیں دیتے۔ ’وہ آپ سے عجیب قسم کی ڈیمانڈ شروع کردیتے ہیں، اگر آپ ان کی ڈیمانڈ پوری نہیں کرتے تو بس آپ پھر کوشش کرو۔‘