وفاقی وزیر داخلہ محسن نقوی نے کہا ہے کہ سعودی عرب اور پاکستان کی تاریخی برادرانہ دوستی سود مند معاشی تعلقات میں بدل رہی ہے۔ سعودی عرب کے سرمایہ کاروں کا حالیہ دورہ پاکستان انتہائی کامیاب رہا۔ پاکستان کے عوام سعودی عرب کے ولی عہد کے دورے کے منتظر ہیں۔ سعودی عرب نے ہر آزمائش میں پاکستان کا ساتھ نبھایا، سعودی ولی عہد کا دورہ پاکستان دونوں ممالک کے تعلقات میں گیم چینجر ثابت ہوگا۔
وفاقی وزیر داخلہ محسن نقوی نے اسلام آباد میں سعودی عرب کے سفارت خانے کا دورہ کیا۔ سفارت خانے آمد پر سعودی عرب کے سفیر نواف بن سعید احمد المالکی نے ان کا خیر مقدم کیا۔ محسن نقوی اور سعودی سفیر کے درمیان ملاقات میں باہمی دلچسپی کے امور، پاک سعودی تعلقات اور مختلف شعبوں میں تعاون بڑھانے پر تبادلہ خیال کیا گیا۔
مزید پڑھیں
وفاقی وزیر داخلہ محسن نقوی نے ایف سی کے جوانوں کے لیے رہائش کا انتظام کرنے پر سعودی عرب کے سفیر کا شکریہ ادا کیا۔ سعودی سفیر نے انہیں اسلام آباد پولیس کی بہتری کے لیے بھرپور تعاون کی یقین دہانی کرائی۔ دونوں کے درمیان سعودی عرب کے ولی عہد محمد بن سلمان کے دورہ پاکستان کے حوالے سے بھی گفتگو ہوئی۔ برما کے مسلمانوں کے لیے سفری دستاویزات پر بھی بات چیت کی گئی۔
محسن نقوی نے کہا کہ موجودہ دور میں پاکستان اور سعودی عرب کے تعلقات نئی بلندیوں پر پہنچ رہے ہیں۔ اس موقع پر سعودی عرب کے سفیر کا کہنا تھا کہ اسلام آباد پولیس کو جدید خطوط پر استوار کرنے کے لیے ہر ممکن تعاون فراہم کریں گے۔ انہوں نے کہا کہ سعودی عرب پاکستان کے ساتھ اپنے تعلقات کو بہت اہمیت دیتا ہے۔
