محکمہ خوراک پنجاب نے گندم کی بین الصوبائی ترسیل پر پابندی کے حوالے سے خبروں کی تردید کردی۔
ترجمان محکمہ خوراک پنجاب کے مطابق محکمہ خوراک پنجاب نے گندم کی ترسیل پر کوئی پابندی عائد نہیں کی اور حکومت پنجاب کی پالیسی کے مطابق گندم کی بین الصوبائی و بین الاضلاعی نقل و حمل کی مکمل اجازت ہے۔
مزید پڑھیں
ترجمان محکمہ خوراک پنجاب نے کہاکہ گندم خریداری پالیسی 2024 کے مطابق گندم کی نقل و حمل کی مکمل اجازت ہے اور محکمہ خوراک پنجاب نے گندم ترسیل پر پابندی بارے کوئی نوٹیفکیشن جاری نہیں کیا۔
انہوں نے کہاکہ گندم کی ترسیل کے لیے کسی قسم کے پرمٹ کی بھی ضرورت نہیں ہے۔
ترجمان نے یہ بھی واضح کیاکہ بعض حلقے وفاقی حکومت کی جانب سے مختلف اشیا کی اسمگلنگ کی روک تھام کے لیے لکھے گئے ایک خط کو گندم کی ترسیل سے جوڑ رہے ہیں جو کہ سراسر غلط فہمی پر مبنی ہے۔
انہوں نے بتایا کہ وفاقی حکومت اور محکمہ داخلہ کی ہدایات کی روشنی میں مختلف اشیا کی اسمگلنگ روکنے کے لیے تمام چیک پوسٹوں پر چوکس اور دیانتدار عملے کی تعیناتی کے لیے خطوط لکھے گئے۔ تاہم گندم کی ترسیل، خرید و فروخت اور بین الصوبائی و بین الاضلاعی نقل و حمل کی مکمل اجازت ہے۔
ترجمان کے مطابق چیک پوسٹوں پر تعینات عملہ اپنی ذمہ داری کے مطابق گندم کی ترسیل کا ریکارڈ مرتب رکھے گا تاکہ یہ علم ہو سکے کہ کس ضلع اور صوبے میں کتنی گندم بھجوائی گئی۔
ترجمان نے بتایا کہ دیگر اجناس کی طرح گندم کا ریکارڈ رکھنا بھی ضروری ہے تاکہ بعدازاں مخصوص عناصر مارکیٹ میں مصنوعی قلت کا تاثر پیدا نہ کرسکیں۔
انہوں نے بتایا کہ پنجاب میں گندم وافر مقدار میں موجود ہے اور پنجاب پاکستان کی فوڈ باسکٹ ہونے کے ناطے دیگر صوبوں کی غذائی ضروریات بھی پوری کرتا ہے۔ اسی ضمن میں ضرورت کے مطابق گندم بھی دیگر صوبوں کو بلا روک ٹوک بھجوائی جارہی ہے۔
