پشاور میں میاں بیوی کو گھر کے اندر فائرنگ کرکے قتل کر دیا گیا ہے، ابتدائی پولیس تفتیش کے مطابق مقتول جوڑے کو پسند کی شادی کرنے پر لڑکی کے خاندان نے نشانہ بنایا ہے۔
مزید پڑھیں
پشاور پولیس کے مطابق دہرے قتل کا واقعہ تھانہ متھرا کی حدود پنام ڈھیری میں پیش آیا، جس کی اطلاع ملتے پولیس جائے وقوعہ پر پہنچ گئی اور لاشوں کو تحویل میں لے کر پوسٹ مارٹم کے لیے اسپتال منتقل کردیا ہے۔
پولیس کی جانب سے فراہم کردہ ابتدائی معلومات کے مطابق پنام ڈھیری کے رہائشی ابرار نے 2 سال قبل گجرڈھنڈ کی رہائشی لڑکی سے خاندان والوں کی مرضی کے خلاف پسند کی شادی کی تھی، لڑکی کے خاندان کی مخالفت کے باعث دونوں نے کورٹ میرج کی تھی۔
پولیس نے بتایا کہ لڑکی کے خاندان والے شادی سے خوش نہیں تھے۔ اور اسی بنا پر مبینہ طور پر انہیں قتل کرنے کا منصوبہ بنایا گیا،
لواحقین نے گجر ڈھنڈ کے رہائشی 4 افراد پر شک کا اظہار کیا ہے، جنہوں نے مبینہ طور پر گھر کے اندر داخل ہوکر میاں بیوی کو فائرنگ کرکے قتل کردیا اور موقع سے فرار ہو گئے۔
پولیس نے جوڑے کے قتل میں نامزد ایک ملزم کو گرفتار کرکے اسلحہ بھی برآمد کرلیا ہے جبکہ دیگر ملزمان کی تلاش جاری ہے۔