قومی کرکٹ ٹیم کے کپتان بابراعظم نے کہا ہے کہ جو ٹیم کے لیے بہتر ہوتا ہے ہم وہ پلان کرتے ہیں، کسی کا بیٹنگ نمبر فکسڈ نہیں ہے، صورتحال کے مطابق نمبر اوپر نیچے ہوسکتا ہے۔
مزید پڑھیں
گزشتہ روز امریکا کے شہر ڈیلاس میں میڈیا سے گفتگو کرتے ہوئے کپتان بابر اعظم نے کہا کہ بدقسمتی سے صائم ایوب ویسا پرفارم نہیں کر پائے جیسی ان سے امید تھی، صائم ایوب گیم چینجر پلیئر ہے لیکن وہ ویسا پرفارم نہیں کرپائے جس کی ضرورت تھی۔
بابر اعظم نے کہا کہ بطور کپتان انہیں ہر کھلاڑی پر بھروسہ ہے اور شاداب پر سب سے زیادہ بھروسہ ہے کیونکہ شاداب نے مختلف کنڈیشنز میں پرفارمنس دی ہے، شاداب خان کھیل کے تینوں شعبوں میں کارکردگی دکھاتے ہیں، امید ہے کہ یہاں کی کنڈیشنز شاداب کے لیے موزوں ہوں گی۔
انہوں نے کہا کہ کرکٹرز کے ساتھ اپ اینڈ ڈاؤن چلتا رہتا ہے، ہم اسے سپورٹ کریں گے، پلیئرز کو جتنا سپورٹ کرتے ہیں اس کا فائدہ ٹیم کو ہی ہوتا ہے، یہ ٹیم گیم ہے کسی پلیئر کا اگر برا دن ہے تو ہم اسے کوور کرتے ہیں۔
’عماد وسیم پہلا میچ نہیں کھیلیں گے‘
بابر اعظم نے بتایا کہ عماد وسیم انجری کے باعث ٹی20 ورلڈ کپ میں امریکا کے خلاف پہلا میچ نہیں کھیل سکیں گے۔ انہوں نے کہا کہ وہ بعد کے میچز کھیل سکیں گے۔
بابر اعظم کا کہنا تھا کہ ہم اچھی تیاریوں کے ساتھ امریکا آئے ہیں، ہمارے ذہن میں ہے کہ ہمیں کس طرح کی کرکٹ کھیلنی ہے، کوشش کریں گے کہ ورلڈ کپ میں اچھا پرفارم کریں اور کامیابی حاصل کریں۔
ٹی 20 ورلڈ کپ میں اب تک ہونے والے میچز کا تجزیہ کرتے ہوئے بابر اعظم نے کہا کہ یہاں پر ہائی اسکورنگ میچز نظر نہیں آ رہے، ہمارے کچھ کھلاڑی یہاں پہلے کھیل چکے ہیں اسلیے ان کو کنڈیشنز کا اندازہ ہے، شاداب، عماد اور حارث پہلے یہاں کھیل کر گئے ہیں۔
بابر اعظم کا کہنا تھا کہ قومی ٹیم ماضی میں بھی ایسے حالات میں کھیل چکی ہے، بیٹرز انڈورز میں ٹریننگ کررہے ہیں، بولرز نے فیلڈ میں ٹریننگ کی ہے، جو دستیاب سہولیات تھیں اس کو استعمال کرتے ہوئے پریکٹس کی ہے۔ وارم اپ میچ نہ ہونے سے کوئی فرق نہیں پڑتا کیونکہ ہم کھیلتے ہوئے آ رہے ہیں۔
’ہمارا ورلڈ کپ پرسوں سے شروع ہے‘
انہوں نے کہا کہ امریکا میں پہلی بار کرکٹ ہو رہی ہے اس لیے یہ نہ سوچیں کہ یہ نہیں یا وہ نہیں مل رہا، ہوٹل سے فاصلہ یا سہولیات پر ہم نہیں سوچ رہے، یہ بورڈ کا کام ہے۔
پاکستان اور امریکا کے درمیان 6 جون کو ہونے والے میچ سے متعلق انہوں نے کہا کہ امریکا کی ٹیم کو ہوم کنڈیشنز اور گراؤنڈز کا معلوم ہے لیکن مجھے اپنی ٹیم پر بھروسہ ہے کہ وہ اچھی کرکٹ کھیلے گی، یہاں فاسٹ بولرز اچھا پرفارم کررہے ہیں اس لیے مجھے اپنی فاسٹ بولرز پر بھروسہ ہے۔
بابر اعظم نے کہا کہ ہمارا ورلڈ کپ پرسوں (جمعرات) سے شروع ہے، اب تمام سینیئر پلیئرز کو آگے بڑھ کر ذمہ داری لینا ہوگی، ہم کوشش کریں گے کہ جو غلطیاں پہلے ہوئیں وہ نہ دہرائیں۔
ایک سوال کے جواب میں بابر اعظم نے کہا کہ انفرادی اہداف بعد میں آتے ہیں، ان کا ایک ہی ہدف ورلڈ کپ جیتنا ہے۔ انہوں نے کہا کہ ان کی توجہ اس پر ہے کہ ٹیم کو ان سے کیا چاہیے، انفرادی ریکارڈ اہمیت نہیں رکھتے۔
