اکثراوقات کام کی وجہ سے انسان کبھی نہ کبھی ذہنی تناؤ کا شکار ہو جاتا ہے جس کے لیے انسان کو اپنی توجہ کسی دوسری جانب مبذول کرنے کے لیے نت نئے طریقے اپنانا پڑتے ہیں تاکہ وہ اپنے اس ذہنی تناؤ سے چھٹکارا پا لے۔
غیر ملکی میڈیا رپورٹ کے مطابق چینی ملازموں نے آفس کی پریشانی اور کام کے تناؤ سے بچنے کے لیے آفس کی میزوں پر کیلے اگانا شروع کردیے۔ صرف یہ ہی نہیں بلکہ ڈیسک پر کیلے اگانے کا یہ جنون علی بابا گروپ کے زیر انتظام ایک بڑا ای کامرس پلیٹ فارم ’Taobao ’ تک پہنچ گیا۔
چین میں تناؤ کے شکار نوجوان پیشہ ور افراد ڈیسک پر اگائے گئے کیلوں کو اپنا دوست بنانے لگ گئے۔ اطلاعات کے مطابق ’بے چینی کو روکو’ نامی اس رحجان میں کام کے تناؤ کو روکنے کے لیے میزوں پر کیلے کاشت کیے جا رہے ہیں۔
سوشل میڈیا پر وائرل اس انوکھی خبر کے مطابق یہ عمل چین کی کمپنیوں میں کیا جارہا ہے جہاں ملازمین سبز کیلے خریدتے ہیں جن کے تنے جڑے ہوتے ہیں اور انہیں پانی سے بھرے گلدانوں میں رکھتے ہیں۔ ایک ہفتے کے دوران تھوڑی سی دیکھ بھال کے ساتھ، کیلے سبز سے سورج کی روشنی میں پیلے رنگ میں پک جاتے ہیں، جو روزمرہ کے کام کے دباؤ پرایک خوشگوار احساس پیدا کرتے ہیں۔
ملازمین کے مطابق سبز کیلوں کا پیلے رنگ میں تبدیل ہونے تک کے سفر کو کام کے دوران خوب انجوائے کیا جاتا ہے جبکہ ان کیلوں کو ایک ساتھ تبدیل ہوتے دیکھنے کا مشترکہ تجربہ بات چیت کا آغاز بن جاتا ہے، جو ساتھیوں کے درمیان ہمدردی کے احساس کو فروغ دیتا ہے۔صرف یہ ہی نہیں بلکہ اس مشق کے دوران ملازمین اپنے اپنے کیلوں پر نام درج کرکے ایک بحث مباحثہ کا راستہ بھی تلاش کرتے ہیں ۔
دوسری جانب اس ’ڈیسک کیلے’ کا جنون Taobao تک بھی پہنچ گیا ہے، جو کہ علی بابا گروپ کے زیر انتظام ایک بڑا ای کامرس پلیٹ فارم ہے۔ اب سینکڑوں اسٹورز خاص طور پر ڈیسک کیلے اگانے کے مقصد کے لیے سبز کیلے فروخت کررہے ہیں جس کی حیران کن قیمت 20ہزار ایک گچھے کی وصول کی جارہی ہے۔
