اونٹنی کی ٹانگ کاٹنے والے وڈیرے نے اونٹنی کے مالک کو بھی مار ڈالا؟

سانگھڑ میں اونٹنی کا وڈیرے کی زمین پر جانا اتنا بڑا جرم بنا کہ اونٹنی کی ایک ٹانگ کاٹ کر اسے سزا دی گئی، وڈیرے کی جانب سے نا صرف ٹانگ کاٹی گئی بلکہ اسے سوشل میڈیا پر بھی ڈالا گیا، معاملے نے شدت اختیار کیا تو قانون حرکت میں آیا کارروائی کا آغاز ہوا اور ساتھ ہی اونٹنی کو کراچی منتقل کردیا گیا جہاں اسکا علاج جاری ہے۔

اونٹنی کے ساتھ پیش آئے افسوسناک واقعہ کے بعد 18 جون کو سوشل میڈیا پر ایک ویڈیو وائرل ہوئی جس کو یہ بتا کر پھیلایا جا رہا تھا کہ زخمی اونٹنی کے مالک سومر بھن کو قتل کردیا گیا ہے، ویڈیو سوشل میڈیا پر آگ کی طرح پھیلی لیکن اس کی تصدیق اس وقت نا ہوسکی بعد ازاں پولیس کی جانب سے ایک بیان جاری کیا گیا جس کے مطابق یہ ویڈیو پنجاب کی ہے سندھ کی نہیں۔

سانگھڑ کے مقامی صحافی ایاز ڈیہری نے وی نیوز کو بتایا کہ یہ ویڈیو پنجاب کی تھی جسے پھیلایا گیا جبکہ اونٹنی کے مالک کی عمر 85 برس ہے اور ان کا سارا کام ان کا بھتیجا دیکھتا ہے۔ انکا مزید کہنا تھا کہ وائرل ہونے والی ویڈیو میں ایک شخص کو مار کر اس کی ویڈیو سوشل میڈیا پر ڈالی گئی تھی، ایاز کہتے ہیں کہ اس ویڈیو کے بعد میں نے خود اونٹنی کے مالک سے بات کی ہے اور وہ ٹھیک ہیں۔

ایاز کہتے ہیں کہ اونٹنی کے مالک کی عمر اتنی ہے کہ وہ زیادہ بات چیت نہیں کرسکتا، وائرل ویڈیو اوریجنل تھی لیکن پنجاب کی تھی جِسے پروپیگنڈا کے طور پر استعمال کیا گیا۔