پاکستان کرکٹ بورڈ (پی سی بی) نے ڈومیسٹک کنٹریکٹ پر نظرثانی کرتے ہوئے کھلاڑیوں اور کوچز کے انتخاب کا نیا طریقہ کار وضع کیا ہے۔
مزید پڑھیں
اس حوالے سے چیئرمین پاکستان کرکٹ بورڈ محسن نقوی کے زیر صدارت نیشنل کرکٹ اکیڈمی کے بورڈ روم میں 3 گھنٹے تک اہم اجلاس جاری رہا جس میں قومی ٹیم میں شمولیت کے لیے ڈومیسٹک کرکٹ کھیلنے کی شرط کو لازمی قرار دیا گیا۔
اجلاس میں طے پایا کہ کارکردگی اور فنٹس پر ہی کھلاڑیوں کا انتخاب کیا جائے گا۔ اس کے علاوہ نئے ٹیلنٹ کو سامنے لانے اور کوالٹی ڈومیسٹک کرکٹ کے فروغ کے لیے تینوں فارمیٹ کے ٹورنامنٹس کرانے کا بھی فیصلہ کیا گیا۔
پی سی بی اجلاس میں ڈومیسٹک کرکٹ نظام کو مضبوط بنانے کے لیے پلان کی اصولی منظوری دی گئی جس کے تحت کوالٹی ڈومیسٹک کرکٹ کو ہر سطح پر فروغ دیا جائے گا، اچھے کھلاڑیوں کی پروفیشنل انداز سے گرومنگ کے لیے کلب لیول سے نیشنل لیول تک تسلسل کے ساتھ ٹورنامنٹس کا انعقاد کیا جائے گا۔
ماسٹر کوچ کی تعیناتی
چیئرمین پی سی بی نے اجلاس سے خطاب میں کہا کہ بہترین کوچز نئے ٹیلنٹ کی ٹریننگ کرکے ان کی صلاحیتوں میں نکھار لائیں گے، کارکردگی، فٹنس اور میرٹ پر کھلاڑیوں کو آگے موقع دیا جائے گا۔
انہوں نے کہا کہ کوالٹی ڈومیسٹک کرکٹ کے فروغ سے انٹرنیشنل کرکٹ سے گیپ کو کم کرنے میں مدد ملے گی۔ اجلاس میں ڈومیسٹک کرکٹ کے لیے کوچنگ کا معیار بھی بہتر بنانے کا فیصلہ کیا گیا۔
ڈومیسٹک کرکٹ کے کوچز کی ٹریننگ کے لیے ماسٹر کوچ کو تعینات کیا جائے گا۔ چیئرمین پی سی بی محسن نقوی نے کہا کہ میرٹ، کارکردگی اور فٹنس پر رتی بھر سمجھوتہ نہیں ہوگا۔
چیئرمین پی سی بی محسن نقوی نے کہا کہ نئے ٹیلنٹ کو سامنے لانے کے لیے ہنگامی بنیادوں پر کام کرنا ہوگا، نئے ٹیلنٹ پر سرمایہ کاری سے کرکٹ کو نچلی سطح پر فروغ ملے گا اور مثبت نتائج سامنے آئیں گے۔
اجلاس میں بھارت، آسٹریلیا، انگلینڈ اور نیوزی لینڈ کے ڈومیسٹک کرکٹ کے ڈھانچے کے خدوخال کا بھی جائزہ لیا گیا اور کوالٹی ڈومیسٹک کرکٹ کے فروغ کے لیے سفارشات اور تجاویز پر غور کیا گیا۔
