کیا پی ٹی آئی کے ناراض ارکان اسمبلی الگ گروپ بنانے والے ہیں؟

سنی اتحاد کونسل میں شامل پاکستان تحریک انصاف (پی ٹی آئی) کے 21 ارکان اسمبلی نے پارٹی سے اختلافات کے باعث اپنا الگ گروپ بنانے کا عندیہ دے دیا۔

میڈیا رپورٹس میں ذرائع کے حوالے سے بتایا گیا کہ پی ٹی آئی کے ناراض ارکان اسمبلی نے پارٹی چیئرمین بیرسٹرگوہر خان اور جنرل سیکریٹری عمرایوب خان کو سنجیدہ کوشش کرنے کا پیغام بھجوایا ہے۔

ذرائع کا کہنا ہے کہ پی ٹی آئی ارکان کا مؤقف ہے کہ پارٹی قیادت بانی پی ٹی آئی عمران خان اور رہنماؤں کی رہائی کے بجائے عہدے حاصل کرنے کے لیے کوشاں ہے۔

پی ٹی آئی ارکان نے پارٹی قیادت سے اختلافات کے باعث پارلیمانی پارٹی کے اجلاسوں میں شرکت سے بھی معذرت کرلی اور کہا ہے کہ سینیٹ میں پارلیمانی لیڈر اور قومی اسمبلی میں سینیئر قیادت کمیٹیوں کے لیے کمپرومائزڈ ہے۔

اختلافات کب سامنے آئے؟

میڈیا رپورٹس میں بتایا گیا ہے کہ پی ٹی آئی رہنماؤں میں اختلافات اس وقت سامنے آئے جب شہریار آفریدی نے استعفیٰ سے متعلق بیان دیا۔ ان کے اس بیان کے بعد پارٹی کے 27 سے زیادہ ارکان نے استعفوں پر مشاورت کی جبکہ شاندانہ گلزار اور شیر افضل مروت نے پی ٹی آئی قیادت کی ناہلی پر احتجاج بھی کیا۔

بعدازاں، مولانا فضل الرحمان اورمحمود اچکزئی نے قومی اسمبلی میں پی ٹی آئی ممبران سے ملاقات کی اور پی ٹی آئی رہنماؤں کو جذبات کے بجائے افہام وتفہیم سے معاملات طے کرنے کا کہا۔

مولانا فضل الرحمان اورمحمود اچکزئی کے مشورے کے بعد شہریارآفریدی نے وقتی طور پر استعفے سے پیچھے ہٹنے کا فیصلہ کیا۔ جبکہ پی ٹی آئی کی سینیئرقیادت نے اراکین سے عمران خان کی رہائی تک اختلاف پرخاموش رہنے کی استدعا کی۔