آئل اینڈ گیس کی تلاش کرنے والی مختلف کمپنیوں نے پاکستان میں 5 ارب ڈالر کی سرمایہ کاری کرنے کا اعلان کیا ہے۔
ہفتہ کے روز وزیراعظم شہباز شریف سے پیٹرولیم اور گیس کی تلاش و پیداواری کمپنیوں کے وفد نے اسلام آباد میں ملاقات کی، اس موقع پر وزیراعظم نے کمپنیوں کو آف شور ذخائر ڈھونڈنے کی دعوت دی۔
یہ بھی پڑھیں گیس اینڈ آئل کمپنی کے حصص کی خریداری کا عمل مکمل، آرامکو نے پاکستانی مارکیٹ میں باضابطہ طور پر قدم رکھ دیا
اجلاس میں پیٹرولیم، گیس کی تلاش اور پیداواری کمپنیوں کے وفد نے وزیراعظم شہباز شریف سے کہا کہ آپ پہلے وزیراعظم ہیں جو سنجیدگی سے پیٹرولیم و گیس کے ذخائر بڑھانے کے بارے میں سوچ رہے ہیں، کمپنیوں کے وفد نے ملک میں 5 ارب ڈالر کی سرمایہ کاری کرنے کا اعلان کیا۔
وفد نے وزیراعظم کو بریفنگ میں بتایا کہ 3 سال میں پیٹرولیم اور گیس کی تلاش کے لیے پاکستان میں 240 جگہ کھدائی کی جائے گی۔
مقامی سطح پر تیل اور گیس کے ذخائر کی تلاش اولین ترجیح
اس موقع پر وزیراعظم نے اس عزم کا اظہار کیاکہ پاکستان میں مقامی سطح پر تیل اور گیس کے ذخائر کی تلاش ہماری اولین ترجیح ہے، پاکستان تیل اور گیس کی درآمد پر ہر سال اربوں ڈالر خرچ کرتا ہے، مقامی ذخائر کی پیداوار سے پاکستان کا زرمبادلہ بچےگا جبکہ ایندھن اورگیس کی قیمت کم ہوگی۔
یہ بھی پڑھیں کوہاٹ: تیل و گیس کی پیداوار میں ریکارڈ اضافہ
وزیرِاعظم نے متعلقہ حکام کو شعبے کے تمام مسائل کا ترجیحی بنیادوں پرحل پیش کرنےکی ہدایت دی۔
