پاکستان تحریک انصاف کے رہنما و سابق وفاقی وزیر علی زیدی نے کہا ہے کہ ملک کو تباہی کے قریب پہنچا کر امپورٹڈ حکومت اب عدالتوں پر حملہ آور ہے، ذاتی مفادات کے لیے قوانین میں ترمیم کر کے عدلیہ پر دباؤ ڈالنے کی کوشش کی جارہی ہے۔
میڈیا کو جاری اپنے بیان میں رہنما پی ٹی آئی علی زیدی نے کہا کہ الیکشن کمیشن کو قانون سے بالاتر بنانے کے لیے قانون کے ہی ہاتھ باندھے جارہے ہیں اور ذاتی مفادات کے لیے قوانین میں ترمیم کر کے عدلیہ پر دباؤ ڈالنے کی کوشش کی جارہی ہے۔
علی زیدی نے کہا کہ ملک کو تباہی کے قریب پہنچا کر امپورٹڈ حکومت اب عدالتوں پر حملہ آور ہے، امپورٹڈ حکومت کا اقدام نظام عدل کو ہی ہتھکڑی لگانے کے مترادف ہے، عدلیہ واحد ادارہ باقی بچا ہے جس سے عوام کو آج بھی انصاف کی امید ہے۔
رہنما پی ٹی آئی نے کہا کہ یہ مافیا قوم اور ملکی اداروں کو یرغمال بنا کر رکھنا چاہتا ہے، ہر گزرتے دن کے ساتھ امپورٹڈ حکومت ملک کو تباہی کی طرف لے جا رہی ہے۔ جس ملک میں انصاف کا نظام مضبوط ہوتا ہے وہی قومیں ترقی کرتی ہیں۔
انہوں نے کہا کہ تحریک انصاف نے ہمیشہ عدلیہ کی آزادی اور خودمختاری کے لیے جدوجہد کی ہے، ہم کسی صورت عدلیہ کو دیگر اداروں کی طرح یرغمال نہیں بننے دیں گے۔
