محکمہ موسمیات نے رواں ہفتے کے دوران ملک میں مزید مون سون بارشوں کی پیشگوئی کردی۔
محکمہ موسمیات کے مطابق، ابحیرہ عرب سے آنے والی مون سون ہوائیں آج سے ملک کے بیشتر علاقوں میں داخل ہوں گی جس کے باعث 21 جولائی (اتوار) تک اسلام آباد، پنجاب، خیبرپختونخوا، گلگت بلتستان اور کشمیر کے بیشتر اضلاع میں گرج چمک کے ساتھ بارش کا امکان ہے۔
یہ بھی پڑھیں: مون سون میں اسلام آباد اور راولپنڈی کے کن علاقوں میں سیلاب کا خطرہ ہے؟
سندھ کے بیشتر اضلاع میں موسم زیادہ تر گرم اور مرطوب رہے گا تاہم جمعرات اور جمعہ کو کراچی، مٹھی، سانگھڑ، عمرکوٹ، تھرپارکر، میرپور خاص اور ساحلی اضلاع میں گرج چمک کے ساتھ بارش کا امکان ہے۔
اسی طرح مری، گلیات، شمالی اور وسطی پنجاب میں بدھ سے ہفتہ تک گرج چمک کے ساتھ بارش کا امکان طاہر کیا گیا ہے جبکہ بدھ سے جمعہ تک جنوبی پنجاب میں بھی آندھی اور گرج چمک کے ساتھ بارش کا امکان ہے۔
بلوچستان میں کل سے 19 جولائی کے دوران بارشیں متوقع ہیں۔ بلوچستان میں صوبے کے بیشتر اضلاع میں موسم گرم اور مرطوب رہے گا تاہم بدھ سے جمعہ تک صوبے کے شمالی اور مشرقی علاقوں میں آندھی اور گرج چمک کے ساتھ بارش کا امکان ہے۔
یہ بھی پڑھیں: دلی کی سڑک، بارش کا پانی اور رولز روئس کی کہانی
گلگت بلتستان میں بدھ سے اتوار تک دیامر، استور، اسکردو، گلگت، گھانچے اور شگر میں بارش کا امکان ہے۔ محکمہ موسمیات نے شدید بارشوں کے باعث مری، مانسہرہ، کوہستان اور کشمیر کے مقامی نالوں اور ندی نالوں میں بہاؤ میں اضافے کی وارننگ دی ہے۔
محکمہ موسمیات کے مطابق، خیبرپختونخوا، کشمیر، اسلام آباد اور راولپنڈی کے بیشتر اضلاع میں گرج چمک کے ساتھ بارش کا امکان ہے۔ موسلا دھار بارشوں سے خیبرپختونخوا، کشمیر اور گلگت بلتستان کے خطرناک پہاڑی علاقوں میں لینڈ سلائیڈنگ بھی ہوسکتی ہے۔
