لاہور ہائیکورٹ نے عمران خان کی اہلیہ بشریٰ بی بی کی جانب سے درج مقدمات اور انکوائریز کی تفصیلات فراہم کرنے کے لیے دائر درخواست پر رجسٹرار آفس کا اعتراض ختم کرتے ہوئے کل سماعت کے لیے مقرر کر دیا ہے۔
لاہور ہائیکورٹ کے جسٹس طارق سلیم نے بشریٰ بی بی کی اپنے خلاف درج مقدمات اور انکوائریز کی تفصیلات فراہم کرنے کے لیے دائر درخواست پر سماعت کی۔
بشریٰ بی بی کی جانب سے دائر درخواست میں مؤقف اختیار کیا گیا ہے کہ عمران خان کو وزیراعظم کے عہدے سے ہٹانے کے بعد ان کیخلاف مقدمات درج کیے جارہے ہیں، اور ان مقدمات اور انکوائریز کی تفصیلات فراہم نہیں کی جارہی ہیں۔
درخواست میں موقف اختیار کیا گیا ہے کہ بشریٰ بی بی کے خلاف اینٹی کرپشن، نیب اور ایف آئی اے میں انکوائری کی تفصیلات بھی فراہم نہیں کی جارہی، عدالت تمام اداروں کو مقدمات اور انکوائری کی تفصیلات فراہم کرنے اور کسی بھی خفیہ مقدمہ میں بشری بی بی کو گرفتار کرنے سے روکنے کا حکم دے۔
واضح رہے کہ رجسٹرار آفس لاہور ہائیکورٹ نے دائر درخواست پر بشریٰ بی بی کے دستاویزات پر انگوٹھے کے نشان نہ ہونے کا اعتراض عائد کیا تھا۔
لاہور ہائیکورٹ نے بشریٰ بی بی کے خلاف درج مقدمات اور انکوائریز کی تفصیلات فراہمی کے لیے درخواست پر رجسٹرار آفس کا اعتراض ختم کرتے ہوئے درخواست کو کل سماعت کے لیے مقرر کرنے کی ہدایت کی ہے۔
