کراچی کے علاقے ماڑی پور روڈ پر واقع مچھر کالونی میں کلینک سے 2 بچوں کی لاشیں برآمد ہوئی ہیں۔ ریسکیو ذرائع کے مطابق جان بحق بچوں کی شناخت حسن اور احمد کے ناموں سے ہوئی ہے دونوں بچے آپس میں بھائی ہیں، جن کی عمریں 7 سے 10 سال کے درمیان بتائی جا رہی ہیں، بچوں کے ہاتھ بندھے ہوئے تھے اور جسم تشدد زدہ تھا۔
بچوں کے والد سراج احمد کا کہنا ہے کہ ان کے پڑوس میں عبدالکریم نامی اتائی ڈاکٹرکا کلینک ہے۔ بچے گزشتہ روز صبح سے پڑوسی عبدالکریم کے پاس تھے، بچوں کی بہن دوپہر میں بھائیوں کو لینےگئی تو عبدالکریم نے کہا بچے تو چلے گئے ہیں جب دیر تک بچے گھر نہیں آئے تو رات 11 بجے ہم عبد الکریم کو لےکر تھانے پہنچے۔
مزید پڑھیں:نانا نے کلہاڑی کے وار سے نواسی کو قتل کردیا، وجہ کیا بنی؟
بچوں کے والد کا مزید کہنا تھا کہ تھانے پہنچنے کے بعد عبدالکریم نے اقرار جرم کرتے ہوئے بتایا ہے کہ بچوں کی لاشیں کلینک میں ہیں، اتائی عبدالکریم نے بچوں کو بے ہوشی کی دوا دی، ہاتھ پیر باندھ کر دونوں بچوں کا گلا دبا دیا۔ ملزم نے اعتراف کیا ہے کہ وہ بچوں کے عوض 4 کروڑ روپے تاوان لینا چاہ رہا تھا۔
پولیس نے دوہرے قتل کا مقدمہ درج کرلیا گیا ہے۔ ملزم سے تفتیش کر رہے ہیں کہ اس نے واردات اکیلے میں کی یا دیگر ساتھی بھی شریک تھے۔ ملزم کو عدالت میں پیش کیا جائے گا تاکہ تفتیش کے لیے وقت لیا جا سکے۔
