نگران وزیراعلیٰ پنجاب محسن نقوی کی زیرصدارت کابینہ کے 12 ویں اجلاس میں عمران خان کی جانب سے ان پر مبینہ طورپر قاتلانہ حملوں کے الزامات کی تحقیقات کے لئے کمیشن کے قیام کی منظوری دے دی گئی۔
محسن نقوی کی زیرصدارت صوبائی کابینہ کا 12 واں اجلاس ہوا جس میں حکومت کی مفت آٹا اسکیم میں مزید خاندانوں کو شامل کرنے کافیصلہ کر لیا گیا اور نادرا میں رجسٹرڈ خاندانوں کو مفت آٹے کی اسکیم میں شامل کرنے کی منظوری دے دی گئی۔
بے نظیر انکم سپورٹ پروگرام میں رجسٹرڈ ایک کروڑ 58لاکھ خاندانو ں کو پہلے ہی مفت آٹا فراہم کیاجارہاہے جبکہ احساس راشن رعایت پروگرام کی بجائے فری آٹا ڈسٹری بیوشن پروگرام کی منظوری دی گئی ہے۔
پنجاب کابینہ نے پاسکو سے3لاکھ میٹرک ٹن مزید گندم لینے کی منظوری دے دی جبکہ شوگر فیکٹریز کنٹرول ایکٹ 1950 میں ترامیم کی بھی منظوری دے دی ہے۔
پنجاب کابینہ نے بجلی کی ڈسٹری بیوشن کمپنیوں کو متعلقہ صوبے کے حوالے کرنے کے حوالے سے ٹرانزیکشن ایڈوائزر تعینات کرنے کی منظوری دے دی جبکہ محکمہ لائیواسٹاک و ڈیری ڈویلپمنٹ میں سیاسی بنیادوں پر تعیناتیوں کو ڈی نوٹیفائی کرنے کی منظوری بھی دے دی گئی ہے۔
پنجاب سوشل سیکیورٹی ہیلتھ مینجمنٹ کمپنی کے بورڈ آف ڈائریکٹرز میں سیاسی تعیناتیوں کو ڈی نوٹیفائی کرنے کی منظوری بھی دے دی گئی۔
کابینہ اجلاس میں پنجاب میڈیم ٹرم مالیاتی فریم ورک (بجٹ سٹریٹجی) رولز 2023 اور پنجاب ان ڈیزائر ایبل کوآپریٹوسوسائٹی ایکٹ 1993میں ترامیم کی منظوری بھی دے دی گئی ہے۔
پنجاب کابینہ نے بورڈ کی جائیداد پر قبضے پرسزا کے خلاف اپیل کاحق سیکرٹری کے علاوہ دوسری اتھارٹی کو دینے کا فیصلہ کر لیا۔
شیخوپورہ، ٹوبہ ٹیگ سنگھ اور چنیوٹ کے اضلاع میں محکمہ سکولز ایجوکیشن کی ترقیاتی اسکیموں کو مکمل کرنے کیلئے فنڈز کی از سر نو توثیق کی گئی۔
اجلاس میں پنجاب حکومت کے اکاؤنٹس برائے مالی سال 2017-18، 2018-19، 2019-20، 2020-21 اور 2021-22 کے بارے میں آڈٹ رپورٹس کی منظوری دی گئی جبکہ کابینہ اسٹینڈنگ کمیٹی برائے فنانس اینڈ ڈویلپمنٹ کے پہلے اجلاس کے فیصلوں کی توثیق کی گئی۔
نگران وزیراعلیٰ محسن نقوی نے صوبائی وزراء اور سیکرٹریز کو فری آٹا ڈسٹری بیوشن سنٹرز کے دورے جاری رکھنے کی ہدایت کرتے ہوئے کہا کہ صوبائی وزراء اورسیکرٹریز کی لوگوں کو فری آٹے کی فراہمی یقینی بنانے کے لئے کاوشیں لائق تحسین ہیں۔
محسن نقوی نے کہا کہ آپ نے آئندہ بھی اسی محنت اور جذبے کے ساتھ سنٹرز کے دورے جاری رکھنے ہیں۔
وزیراعلیٰ پنجاب محسن نقوی کی زیر صدارت کابینہ اجلاس میں صوبائی وزراء، مشیران، چیف سیکرٹری، انسپکٹر جنرل پولیس اور متعلقہ حکام نے شرکت کی۔
