وزیراعظم شہباز شریف کی خصوصی ہدایت پر سی 130 طیارہ ایران بس حادثے میں جاں بحق پاکستانی زائرین کی میتیں اور زخمی زائرین کو لے کر جمعہ کی شب جیکب آباد پہنچ گیا۔
یہ بھی پڑھیں:ایران میں پاکستانی زائرین کی بس کو حادثہ کیوں پیش آیا؟ ہوشربا انکشاف
ایران کے شہر یزد میں بس حادثہ میں جاں بحق ہونے والے 28 پاکستانی زائرین کی میتیں پاکستان ایئر فورس کے خصوصی سی 130 طیارے کے ذریعے شہباز ایئر بیس جیکب آباد لائی گئیں جہاں سے انہیں ورثاکے حوالے کیا گیا۔
شہباز ایئر بیس پر جاں بحق پاکستانی زائرین کی نماز جنازہ بھی ادا کی گئی جس میں صوبائی وزیر اطلاعات سندھ ناصر حسین شاہ، ایئر بیس پر موجود پاک فضائیہ کے افسران، جوانوں اور لواحقین نے شرکت کی۔
لواحقین کے لیے خصوصی انتظامات
شہباز ایئر بیس پر لواحقین کے لیے خصوصی انتظامات کئے گئے تھے، زخمیوں کے لئے ایمبولینسیں اور شدید زخمیوں کے لئے ایئر ایمبولینسیں کا بھی انتظام موجود تھا۔
یہ بھی پڑھیں:ڈیرہ اسماعیل خان میں ٹریفک حادثہ، ایران جانے والے 2 زائرین جاں بحق، 17 زخمی
واضح رہے کہ ایران بس حادثے میں 28 پاکستانی زائرین جاں بحق اور 23 زخمی ہوئے تھے جن میں سے 14 زخمیوں کی حالت تشویشناک ہے۔ میتوں کے ساتھ 15 زخمیوں کو بھی پاکستان لایا گیا ہے۔
ایران میں نماز جنازہ
قبل ازیں جاں بحق ہونے والے 28 پاکستانی زائرین کی یزد ایئر پورٹ پر بھی نماز جنازہ ادا کی گئی جس میں ایرانی سپریم لیڈر کے نمائندہ، گورنر یزد اور پاکستانی سفیر سمیت ایرانی حکام نے شرکت کی۔
