پاکستان شوبز انڈسٹری کی معروف اداکارہ مریم نفیس کا کہنا ہے کہ پاکستانی عوام کو اخلاقی طور پر کرپٹ اور جھوٹا قرار دے دیا۔
حال ہی میں اداکارہ مریم نفیس نے ایک فیشن میگزین کے پوڈ کاسٹ میں شرکت کی جہاں انہوں نے مختلف موضوعات پر اپنے خیالات کا اظہار کیا۔ ان کا کہنا تھا کہ پاکستانی عوام کرپٹ اور جھگڑالو ہے، سب اپنے مفاد کے لیے ایک دوسرے سے جھوٹ بولتے ہیں۔ پاکستان میں اگر کسی کو کوئی کام کروانا ہے تو اس کے لیے میرٹ نہیں دیکھا جاتا۔
مریم نفیس کے مطابق پاکستان اس وقت بین الاقوامی سطح پر مسائل سے دو چار ہے، معیشت تباہ حال ہے، ہمیں صرف مہنگائی کا سامنا نہیں ہے بلکہ کئی سنگین مسائل اور بھی ہیں۔ ان میں سیاسی عدم استحکام، بچوں کا اغوا برائے تاوان، ہراسانی اور جنسی زیادتی کے واقعات، گھریلو تشدد، شرحِ ناخواندگی، صحت کے مسائل وغیرہ شامل ہیں لیکن ہم صرف مہنگائی کا رونا روتے ہیں اور بڑے مسائل سے لاعلم ہیں۔
اداکارہ کا کہنا ہے کہ اس وقت کراچی کا شمار خطرناک ترین شہروں کی فہرست میں دوسرے نمبر پر ہے۔ اب یہ شہر زندگی بسر کرنے کے لائق بھی نہیں رہا۔ انہوں نے مزید کہا ہے کہ اس کا مطلب یہ نہیں ہے کہ یہاں کے عوام برے ہیں بلکہ یہاں انفرااسٹرکچر، ٹریفک، شجرکاری کے مسائل ہیں، اسٹریٹ کرائم عروج پر ہے اورکوئی اس شہر کو اپنا مانتا ہی نہیں ہے۔
معروف اداکارہ کا مزید کہنا تھا کہ میں پاکستان میں خود کو غیر محفوظ محسوس کرتی ہوں کیونکہ مردوں نے خواتین کے لیے ایک غیر محفوظ ماحول بنا رکھا ہے۔
’دیار دل’، ‘عشق بے نام’، ‘حیا کے دامن میں’، ‘کبھی بینڈ، کبھی باجا’، ‘یاریاں’، ‘محبت نہ کریو’، ‘جھوٹی’ اور ‘کچھ نہ کہو‘ جیسے ڈراموں میں شاندار اداکاری کرنے والی اداکارہ مریم نفیس نے ہدایتکار اور اپنے قریبی دوست امان احمد سے اکتوبر 2022ء میں شادی کی تھی۔
