ربیع الاول کا چاند دیکھنے کے لیے مرکزی رویت ہلال کمیٹی نے 4 ستمبر بروز بدھ اسلام آباد میں اجلاس طلب کرلیا ہے، جس میں چاند نظر آنے سے متعلق فیصلہ کیا جائے گا۔
مرکزی رویت ہلال کمیٹی کے مجوزہ اجلاس کی صدارت مولانا سید محمد عبدالخبیر آزاد اسلام آباد میں کریں گے، جس میں علماء کرام ، وزارتِ سائنس اینڈ ٹیکنالوجی، محکمہ موسمیات اور سپارکو کے نمائندے شریک ہوں گے۔
یہ بھی پڑھیں: رویت ہلال کمیٹی کے لیے دم پخت ، تنقید کے بعد ٹینڈر منسوخ
اجلاس میں رابطہ کے فرائض ڈائریکٹر جنرل وزارت مذہبی امور سید مشاہد حسین خالد سرانجام دیں گے، اس حوالے سے زونل رویت ہلال کمیٹیز کے اجلاس صوبائی ہیڈکوارٹرز میں ہوں گے، جس کے بعد چاند دیکھنے کے حوالے سے اعلان کیا جائے گا۔
ذرائع کے مطابق 4 ستمبر بروز بدھ چاند نظر آنے کی صورت میں 12 ربیع الاول 16 ستمبر بروز پیر کو ہو گی، لیکن چاند نظر نہ آنے کی صورت میں عید میلاد النبیﷺ 17 ستمبر بروز منگل کو منائی جائے گی۔
