معروف کیریئر کونسلر احمر خان اور سلمان شفا نے کہا ہے کہ خنجراب سے گوادر تک 5 ہزار کلومیٹر سائیکل پر سفر کی مہم کا آغاز کردیا ہے، اس دوران 100 سے زیادہ اداروں کے 10 ہزار طلبہ سے ملاقاتیں ہوں گی۔
اسلام آباد میں پریس کانفرنس کرتے ہوئے انہوں نے کہاکہ ’کچھ بن کے دکھاؤ مہم‘ کا مقصد نوجوانوں اور والدین کو تیزی سے بدلتے ہوئے چیلنجز کے مطابق تیار کرنا ہے، تاکہ وہ اپنی صلاحیتوں اور خوابوں کے مطابق کیریئر کا انتخاب کرسکیں۔
یہ بھی پڑھیں 90 روز میں 40 شہروں کا سفر، پاکستانی سائیکلسٹ قوم کو کیا پیغام دینا چاہتے ہیں؟
احمر خان کا کہنا تھا کہ اس دروان وہ 5 ہزار کلومیٹر کا سفر سائیکل پر کریں گے، جس میں وہ اور ان کی ٹیم 100 سے زیادہ اداروں کے 10 ہزار طلبہ، 2 ہزار والدین اور ہزار سے زیادہ اساتذہ سے ملاقات کریں گے اور انہیں کیریئر سے متعلق رہنمائی فراہم کریں گے۔
احمر خان نے کہاکہ پاکستان دنیا کے خوبصورت ممالک میں شمار ہوتا ہے، لیکن پاکستان کا یہ روشن چہرہ دنیا کے سامنے کم آتا ہے۔
احمر خان کے مطابق یہ سفر 3 مہینے 10 دن جاری رہے گا، جس کے دوران بچوں میں بڑا خوب دیکھنے اور کچھ کر دکھانے کا جذبہ پیدا کیا جائے گا۔
ان کا کہنا تھا کہ نوجوانوں کے لیے اپنی زندگی کے فیصلے خود کرنے کی ضرورت ہے، پاکستان اس وقت دنیا کے ان ممالک میں ہے جہاں نوجوانوں کی بہت بڑی تعداد ہے۔
احمر خان نے کہاکہ اس مہم میں والدین اور طلبہ کو کیریئر کونسلگ کی اہمیت اور اس کی ضرورت کے بارے میں آگہی دی جائے گی۔ طلبہ کو وہ ٹولز اور وسائل فراہم کیے جائیں گے جس کی بنیاد پر وہ اپنے مستقبل کا فیصلہ جدید تقاضوں کو سامنے رکھ کر علم وآگہی پر کرسکیں گے۔
یہ بھی پڑھیں بلوچستان میں صحت مندانہ سرگرمیوں کا انعقاد، نوجوانوں کی بھرپور دلچسپی
انہوں نے کہاکہ مہم کے دوران طلبہ کی صلاحیتوں اور ٹیلنٹ کو ان کے خوابوں اور دستیاب مواقع کے ساتھ ہم آہنگ کرنے کی بھی آگہی دی جائے گی۔
انہوں نے کہاکہ اس مہم کی خصوصیت یہ ہے کہ یہ اپنی نوعیت کا پہلا پروگرام ہے جس کے تحت والدین، طلبہ اور اساتذہ کو فری کوچنگ دی جائے گی۔
