پاکستان تحریک انصاف (پی ٹی آئی) کے سینیئر رہنما نعیم حیدر پنجوتھا نے کہا ہے کہ کل ڈی چوک میں احتجاج ملتوی ہونے کی خبریں درست نہیں۔
انہوں نے کہاکہ میری اڈیالہ جیل میں عمران خان سے ملاقات ہوئی ہے، اور انہوں نے ہدایات جاری کی ہیں کہ کل کے احتجاج کو ہر صورت کامیاب بنانا ہے۔
نعیم حیدر پنجوتھا نے کہاکہ عمران خان نے کہا ہے کہ قوم اپنی حقیقی آزادی اور اپنے بچوں کے مستقبل کے لیے ہر صورت باہر نکلے اور احتجاج کو کامیاب بنائے۔
ابھی ہی اڈیالہ جیل سے نکلا ہوں، دو ٹوک پیغام ہے عمران خان صاحب کا کہ کل ہر صورت ڈی چوک احتجاج ہوگا” @NaeemPanjuthaa
— Salman Akram Raja ˢᵃᵗⁱʳᵉ (@SalmanAkramRaja) October 3, 2024
انہوں نے کہاکہ کل ڈی چوک میں ہونے والے احتجاج میں علی امین گنڈاپور سمیت دیگر رہنما شرکت کریں گے، آئینی ترامیم کی جو کوشش کی جارہی ہے ہم اسے ناکام بنائیں گے۔
واضح رہے کہ اس سے قبل وفاقی وزیر داخلہ محسن نقوی نے اسلام آباد میں پریس کانفرنس کرتے ہوئے پی ٹی آئی کو خبردار کیا ہے کہ کل ڈی چوک میں احتجاج کی کسی صورت اجازت نہیں دی جائے گی۔
انہوں نے کہاکہ ملائیشیا کے وزیراعظم پاکستان کے دورے پر ہیں، جبکہ وفاقی دارالحکومت میں اہم نوعیت کی بین الاقوامی تقاریب ہورہی ہیں۔
محسن نقوی نے کہاکہ تحریک انصاف نے کل احتجاج کی کال دی ہے، لیکن ہمیں سوچنا چاہیے کہ کوئی احتجاج پاکستان کی قیمت پر نہیں ہونا چاہیے، پی ٹی آئی بھی پاکستان کی جماعت ہے کوئی باہر کی جماعت نہیں۔
وزیر داخلہ نے کہاکہ سیاست کریں مگر یہ طریقہ درست نہیں ہے، کیونکہ ایک سربراہ مملکت پاکستان میں موجود ہیں، جبکہ سعودی عرب کا وفد بھی پاکستان آرہا ہے۔
یہ بھی پڑھیں کل اسلام آباد پر دھاوا بولا گیا تو نرمی نہیں برتی جائےگی، وزیر داخلہ محسن نقوی کی پی ٹی آئی کو وارننگ
انہوں نے کہاکہ اگر کوئی احتجاج کرے گا تو ہم روکنے کے لیے ہر حد تک جائیں گے، اس کے لیے تیاری پوری ہے، پھر بعد میں کوئی شکوہ نہ کرے۔
