آج قومی اسمبلی اجلاس میں مسلم لیگ ن کے رکن شیخ روحیل اصغر سینئر اینکرپرسن اوریا مقبول جان پر برس پڑے کہا اوریا مقبول جان کی جرات کیسے ہوئی کہ اس نے قائداعظم سے زیادہ عمران خان کو مقبول قرار دیا۔
شیخ روحیل اصغر نے اسپیکر قومی اسمبلی سے درخواست کی کہ اوریا مقبول جان کو کڑی سزا دی جائے کہ دوبارہ کوئی ایسی جرات نہ کر سکے۔ اسپیکر قومی اسمبلی راجا پرویزاشرف نے کہا ’یہ قابل مذمت ہے معاملہ قائمہ کمیٹی استحقاق کو بھیجتا ہوں‘۔
اس موقع پر جی ڈی اے کی رکن قومی اسمبلی سائرہ بانو نے کہا ’اس مذمت اور کارروائی میں اے این پی کے سینیٹر ہدایت اللہ کو بھی شامل کریں۔ ہدایت اللہ نے سینیٹ میں آویزاں قائداعظم کی تصویر کی طرف ایسی غلط بات منسوب کی تھی جسے بیان کرنا بھی توہین ہے۔
اس پر راجا پرویز اشرف نے کہا ’وہ معاملہ سینیٹ میں پیش آیا تھا اس کے معاملے کو وہیں رہنے دیں۔ اسپیکر نے اے این پی سینیٹر کا معاملہ استحقاق کمیٹی کو بھیجنے سے انکار کر دیا۔
