کراچی کے علاقے ماڈل کالونی روڈ پر واٹر ٹینکر کی ٹکر سے موٹرسائیکل پر سوار 2 کمسن بھائی جاں بحق ہوگئے جبکہ تیسرا بھائی اور تینوں کا ماموں زخمی ہوگئے۔
پولیس کے مطابق واٹر ٹینکر ڈرائیور کو گرفتار کرکے ماڈل کالونی تھانے منتقل کردیا گیا ہے۔
یہ بھی پڑھیں: کارساز حادثہ کیس: ملزمہ نتاشا دانش کو رہائی کے بعد کن چیزوں کا سامنا ہوگا؟
حادثے میں جاں بحق ہونے والوں میں 9 سالہ طلحہ اور 11 سالہ شاہ محمد شامل ہیں جبکہ 10 برس کا ارحم اور تینوں بچوں کا ماموں بابر زخمی ہوگئے۔
پولیس کے مطابق چاروں افراد ایک ہی موٹر سائیکل پر سفر کررہے تھے اور زخمی ماموں بابر موٹر سائیکل چلارہا تھا۔
مقتولین کے پڑوسیوں کا کہنا ہے کہ بچے اپنے ایک ماموں کے ساتھ دوسرے ماموں کو ایئرپورٹ چھوڑنے گئے تھے اور واپسی پر یہ حادثہ پیش آگیا۔
مزید پڑھیے: کراچی ایئرپورٹ دھماکے کی تحقیقات میں اہم پیش رفت، خاتون سمیت 9 مشکوک افراد گرفتار
واقعے کے خلاف علاقہ مکینوں نے ماڈل کالونی روڈ پر احتجاج بھی کیا۔ پولیس کے مطابق اہل خانہ بچوں کی میتیں لے کر آبائی علاقے مانسہرہ روانہ ہوگئے ہیں جہاں سے واپسی پر واقعے کا مقدمہ درج کرائیں گے۔
