پاکستان کرکٹ بورڈ (پی سی بی) نے آئندہ برس پاکستان میں ہونے والی چیمپیئنز ٹرافی کے فائنل میچ کے حوالے سے برطانوی اخبار کے دعوے کو رد کردیا۔
برطانوی اخبار کی ایک خبر میں دعویٰ کیا گیا ہے کہ آئی سی سی چیمپیئنز ٹرافی میں اگر بھارت فائنل میں پہنچ گیا تو فائنل پاکستان سے باہر کھیلا جائے گا۔
یہ بھی پڑھیں چیمپیئنز ٹرافی، پاکستان آنے سے متعلق بھارتی کرکٹ بورڈ نے پالیسی بیان دے دیا
پاکستان کرکٹ بورڈ نے برطانوی اخبار کی اس خبر کی تردید کرتے ہوئے کہا ہے کہ ہم چیمپیئنز ٹرافی کے تمام میچوں کے حوالے سے اپنا ایک واضح مؤقف رکھتے ہیں۔
پی سی بی نے کہاکہ چیمپیئنز ٹرافی کا فائنل پاکستان سے باہر ہونے کے حوالے سے کوئی تجویز زیرغور نہیں ہے، ہمارا اس حوالے سے واضح پیغام ہے کہ تمام میچ پاکستان میں ہی ہوں گے۔
پاکستان کرکٹ بورڈ نے کہاکہ ہم آئی سی سی چیمپیئنز ٹرافی کی میزبانی کے لیے تیار ہیں اور اس سلسلے میں اسٹیڈیمز کی اپ گریڈیشن کی جارہی ہے۔
یاد رہے کہ پاکستان 2025 میں آئی سی سی چمیپیئنز ٹرافی کی میزبانی کرے گا جو فروری اور مارچ میں کھیلی جائے گی۔
یہ بھی پڑھیں چیمپیئنز ٹرافی کا پاکستان میں انعقاد، آئی سی سی نے پی سی بی کو کیا جواب دیا، محسن نقوی نے بتادیا
بھارتی کرکٹ بورڈ نے ابھی تک اس حوالے سے فیصلہ نہیں کیاکہ وہ اپنی ٹیم پاکستان بھیجے گا یا نہیں۔
