پاکستانی امپائر علیم ڈار عالمی کرکٹ سے ریٹائر ہو گئے۔ علیم ڈار کو اپنے آخری میچ میں ‘گارڈ آف آنر’ بھی دیا گیا۔
علیم ڈار نے جمعہ کو انٹرنیشنل کرکٹ کونسل (آئی سی سی) ایلیٹ پینل کے امپائر کے طور پر اپنے فائنل میچ میں امپائرنگ کی۔
آئی سی سی ایلیٹ پینل امپائر کے طور پر معروف پاکستانی امپائر علیم ڈار کو جمعہ کے روز بنگلہ دیش اور آئرلینڈ کے درمیان ہونے والے میچ کے دوران گارڈ آف آنر دیا گیا۔ علیم ڈار کا یہ آخری میچ بھی تھا جس میں وہ اس امپائر کی ذمہ داری نبھا رہے تھے۔
میچ میں بنگلہ دیش نے 138 رنز کے ہدف کا کامیابی سے تعاقب کیا اور آخری میچ کے آخری دن سات وکٹوں سے کامیابی حاصل کی جس میں علیم ڈار نے بطور امپائر فرائض انجام دیے ہیں۔
علیم ڈار کے ایلیٹ پینل سے باہر ہونے کی تصدیق آئی سی سی نے 16 مارچ کو ایک پریس ریلیز کے ذریعے کی تھی۔
پاکستانی امپائر نے 2000 میں بین الاقومی سطح پر ڈیبیو کیا جس کے بعد 2002 میں انہیں آئی سی سی انٹرنیشنل پینل آف امپائرز میں مقرر کیا اور2003 میں جنوبی افریقہ میں ہونے والے آئی سی سی مینز کرکٹ ورلڈ کپ میں امپائرنگ کی تھی۔
علیم ڈار 2004 میں آئی سی سی امپائرز کے ایلیٹ پینل کے رکن کے طور پر مقرر ہوئے۔ وہ ایلیٹ پینل میں تعینات ہونے والے پہلے پاکستانی تھے۔
علیم ڈار نے اپنے شاندار کیریئر کے دوران کل 438 بین الاقوامی میچوں میں امپائرنگ کی۔
علیم ڈار کی خدمات کو سراہتے ہوئے آئی سی سی کے سی ای او جیف ایلارڈائس نے کہا ہے کہ عالمی کرکٹ اور آئی سی سی میں علیم کی کاگردگی قابل ذکر ہے۔
دوسری جانب علیم ڈار نے 2009 اور 2011 کے درمیان مسلسل تین سال تک آئی سی سی امپائر آف دی ایئر قرار دیے جانے کو یادگار قرار دیا۔
علیم ڈار نے کہا کہ یہ ایک لمبا سفر تھا جہاں انہیں دنیا بھر میں امپائرنگ کرنے کا موقع ملا۔
ان کا مزید کہنا تھا کہ وہ اب بھی ایک بین الاقوامی امپائر کے طور پر کام جاری رکھنے کے خواہاں ہیں لیکن انہوں نے یہ محسوس کیا کہ یہ ریٹائر ہونے کا صحیح وقت ہے۔
