سی ٹی ڈی کی جانب سے ایئرپورٹ کے قریب دھماکے کی ابتدائی رپورٹ انسدادِ دہشتگردی عدالت کراچی میں پیش کردی گئی ہے۔ خودکش دھماکے میں کالعدم تنظیم کو ملوث قرار دیا گیا ہے، دہشتگردوں نے ملک دشمن غیر ملکی خفیہ ایجنسی کی مدد سے دھماکا کیا، دہشتگرد نے اپنی گاڑی کو چینی باشندوں کے قافلے کی گاڑیوں کے قریب لا کر دھماکے سے اڑایا۔
سی ٹی ڈی کی ابتدائی رپورٹ کے مطابق خودکش دھماکا آؤٹر ٹرمینل جناح انٹرنیشنل ٹرمینل کے قریب سی اے اے گارڈ روم کے سامنے ہوا اور پولیس دھماکے کی آواز سن کر موقع پر پہنچی۔
مزید پڑھیں:پاکستان میں چینی باشندوں پر کون کون سے بڑے حملے ہو چکے ہیں؟
موقع پر دیکھا پولیس، رینجرز و دیگر افراد زخمی حالت میں موجود تھے۔ دھماکے میں 2 چینی باشندوں سمیت 3 افراد جاں بحق اور 12 سے زائد افراد زخمی ہوئے۔ خودکش دھماکے کی ذمہ داری کالعدم تنظیم نے قبول کرلی ہے۔ دھماکے میں 15 گاڑیاں مکمل طور پر تباہ ہوئیں۔ واقعےکا مقدمہ تھانہ ایئرپورٹ کے ایس ایچ او کی مدعیت میں درج کیا گیا ہے۔
مقدمے میں قتل، اقدام قتل، حملہ، دھماکا خیزمواد، دہشتگردی اور دیگر دفعات شامل ہیں، دھماکے کا مقدمہ سی ٹی ڈی میں درج کیا گیا ہے۔
واضح رہے کہ گزشتہ اتوار (3 اکتوبر) کی شب کراچی ایئرپورٹ کے قریب بم دھماکے میں 2 چینی انجینئرز سمیت 3 افراد ہلاک جبکہ 17 زخمی ہوگئے تھے، زور دار دھماکے کے بعد گاڑیوں میں آگ لگ گئی، زخمیوں میں خاتون، پولیس اور رینجرز اہلکار بھی شامل ہیں۔
