چین کے وزیر اعظم لی چیانگ شنگھائی تعاون تنظیم کے سربراہی اجلاس میں شرکت کے لیے 4 روزہ دورے پر کل پاکستان پہنچیں گے۔ چینی وزیر اعظم کے ہمراہ تجارت، خارجہ، قومی ترقی اور اصلاحاتی کمیشن کے وزرا بھی ہوں گے۔
ترجمان دفتر خارجہ ممتاز زہرہ بلوچ نے کہا ہے کہ چین کے وزیراعظم لی چیانگ وزیراعظم شہبازشریف کی دعوت پر پاکستان کا دورہ کررہے ہیں، چینی وزیر اعظم 17 اکتوبر تک پاکستان میں قیام کریں گے، چینی وزیر اعظم کے ہمراہ تجارت، خارجہ، قومی ترقی اور اصلاحاتی کمیشن کے وزرا بھی ہوں گے۔
مزید پڑھیں: ایس سی او اجلاس: میٹرو بس سروسز کب سے اور کتنے روز کے لیے بند رہیں گی؟
ممتاز زہرہ بلوچ نے بتایا کہ وفد میں چائنا انٹرنیشنل ڈویلپمنٹ کارپوریشن ایجنسی اور دیگر اعلیٰ حکام شامل ہوں گے۔ لی چیانگ اور شہباز شریف کے درمیان وفود کی سطح پر سی پیک، معاشی تعاون اور دوطرفہ تجارت پر بات ہوگی، ملاقات میں علاقائی اور عالمی صورتحال پر بھی تبادلہ خیال ہوگا۔
ترجمان دفتر خارجہ کا کہنا تھا کہ چین کے وزیر اعظم صدر مملکت آصف علی زرداری، وزیراعظم میاں شہباز شریف، پارلیمانی لیڈروں اور اعلیٰ عسکری قیادت سے بھی ملاقاتیں کریں گے۔
