پاکستان کرکٹ ٹیم کے سابق کپتان بابر اعظم نے اپنی جگہ ٹیسٹ اسکواڈ میں شامل نوجوان بیٹر کامران غلام کی ڈیبیو سینچری پر انہیں مبارکباد دی ہے۔
سوشل میڈیا سائٹ انسٹا گرام پر بابر اعظم نے سجدہ شکر کرتے ہوئے کامران غلام کی تصاویر شیئر کرتے ہوئے لکھا ’کامران بہت اچھا کھیلے‘۔
یہ بھی پڑھیں ‘4 سال سے اس دن کا انتظار تھا’، ڈیبیو ٹیسٹ میں سینچری بنانے والے کامران غلام نے مزید کیا کہا؟
واضح رہے کہ انگلینڈ کے خلاف دوسرے ٹیسٹ میچ میں بابر اعظم کی جگہ ٹیم میں شامل ہونے والے کامران غلام نے کیریئر کے پہلے ٹیسٹ میچ میں سینچری اسکور کی، اور وہ 118 رنز بنا کر آؤٹ ہوئے۔
مجھے انتظار تھا کہ ٹیم میں کب موقع ملے گا، کامران غلام
میچ کے بعد گفتگو کرتے ہوئے کامران غلام نے کہاکہ مجھے انتظار تھا کہ ٹیم میں کب موقع ملے گا، اور جب موقع ملا تو 100 فیصد کارکردگی پیش کرنے کی کوشش کی۔
کامران غلام نے کہاکہ اپنے پہلے ہی میچ میں سینچری اسکور کرنے پر اللہ کا شکر ادا کرتا ہوں، جب وکٹ پر آیا تو پریشر بہت تھا، لیکن اپنی طرف سے 100 فیصد دینے کی کوشش کی۔
یہ بھی یاد رہے کہ کامران غلام کا تعلق خیبرپختونخوا سے ہے، اور وہ بائیں ہاتھ کے اسپنر بھی ہیں۔
یہ بھی پڑھیں ’اب تو بابر اعظم پکے پکے ٹیسٹ ٹیم سے آؤٹ ہو جائیں گے‘ کامران غلام کی سینچری پر صارفین کے تبصرے
کامران غلام نے ڈومیسٹک کرکٹ میں بھی شاندار کارکردگی کا مظاہرہ کیا، اور 59 میچوں میں 49.17 کی اوسط سے 4 ہزار 377 رنز اسکور کیے۔
