گلگت کے علاقے مقپون داس کے قریب ایک افسوسناک حادثہ پیش آیا، جس میں ایک ملائیشیئن سیاح موٹر سائیکل حادثے میں جاں بحق ہو گیا۔
ریسکیو ذرائع کے مطابق حادثے میں جاں بحق ہونے والے سیاح کا تعلق ملائیشیا سے تھا، جو گلگت بلتستان کی سیاحتی سرگرمیوں میں شرکت کے لیے علاقے میں موجود تھا۔
حادثے کی اطلاع ملتے ہی ریسکیو اہلکار فوری طور پر جائے وقوعہ پر پہنچ گئے اور لاش کو ایمبولینس کے ذریعے پی ایچ کیو ہسپتال گلگت منتقل کیا گیا۔
ہسپتال میں جاں بحق سیاح کی شناخت اور ضروری قانونی کارروائیاں مکمل کی جا رہی ہیں۔ مقامی پولیس اور دیگر متعلقہ ادارے حادثے کی وجوہات معلوم کرنے کے لیے مزید تحقیقات کر رہے ہیں۔
یہ بھی پڑھیں:گلگت بلتستان حکومت کا ٹرافی ہنٹنگ سیزن کے لیے بولی کے عمل کا باضابطہ اعلان
ابتدائی معلومات کے مطابق موٹر سائیکل حادثہ تیز رفتاری اور موٹر سائیکل کے بے قابو ہونے کی وجہ سے پیش آیا۔ تاہم، اس حادثے کی تفصیلی تحقیقات جاری ہیں، تاکہ مزید حقائق سامنے آ سکیں اور ایسے حادثات کی روک تھام کے لیے بہتر حفاظتی اقدامات کیے جا سکیں۔
پولیس رپورٹ کے مطابق آج 2 بجے اسکردو مقپون داس میں غیر ملکی سیاح وونگ ہین ہی کو حادثہ پیش آیا جو زخموں کی تاب نہ لاتے ہوِئے موقع پر چل بسا۔
غیر ملکی سیاح اس وقت حادثے کا شکار ہوا جب وہ اسکردو کی طرف جارہا تھا۔
