عالمی مارچ برائے امن وعدم تشدد کے ارکان 26 سے 31 اکتوبر تک پاکستان کا دورہ کریں گے اور ملک کے 2 بڑے شہروں کراچی اور لاہور میں قیام کریں گے۔
عالمی امن، عدم تشدد اور تخفیف اسلحہ کو فروغ دینے کے لیے قائم کیے گئے اس عالمی فورم کا آغاز 2009 میں شروع کیا گیا تھا اور اس کے بعد سے یہ بین الاقوامی یکجہتی کے قیام کے لیے ایک طاقتور پلیٹ فارم بن گیا ہے، اس فورم نے اس سے قبل دنیا بھر کے سینکڑوں شہروں میں مارچ کیے ہیں۔
امن مارچ کا حالیہ تیسرا ایڈیشن 2 اکتوبر 2024 کو کوسٹا ریکا کے شہر سان ہوزے سے شروع ہوا اور 5 براعظموں کا سفر کرنے کے بعد 5 جنوری 2025 کو اسی مقام پر اختتام پذیر ہوگا۔
وزارت داخلہ کی جانب سے جاری بیان میں کہا گیا ہے کہ مارچ کے ارکان 26 سے 31 اکتوبر تک پاکستان آئیں گے اور کراچی اور لاہور کا دورہ کریں گے۔ پاکستان سے تعلق رکھنے والے ارکان کراچی میں مارچ میں شرکت کریں گے۔ سول سوسائٹی اور امن کے قیام کے لیے کوشاں کارکنوں کی بڑی تعداد میں شامل ہونے کا امکان ہے۔
2009 میں دنیا بھر کے 400 شہروں میں منعقد ہونے والے پہلے ورلڈ مارچ کا مقصد امن اور تخفیف اسلحہ کو فروغ دینا تھا۔
دوسرا ایڈیشن 51 ممالک اور 122 شہروں میں پھیلا ہوا ہے، جس نے تحریک کو مزید وسعت دی۔ توقع ہے کہ اس تیسرے ایڈیشن کا اس سے بھی بڑا اثر پڑے گا، جس میں پاکستان اپنے روٹ پر ایک اہم ملک ہے۔
پاکستان نے دنیا بھر میں اقوام متحدہ کے امن مشنز میں شمولیت اختیار کرکے تنازعات کی روک تھام اور انتظام میں بھی کردار ادا کیا ہے۔
