چیف جسٹس آف پاکستان کی تقرری کے لیے پارلیمان کی خصوصی کمیٹی کے لیے نامزد پاکستان تحریک انصاف ( پی ٹی آئی ) کی حمایت یافتہ سنی اتحاد کونسل کے اراکین نے اجلاس میں شرکت سے صاف انکار کر دیا ہے۔
یہ بھی پڑھیں:مولانا فضل الرحمان کا اسد قیصر سے رابطہ، خصوصی پارلیمانی کمیٹی میں شرکت کی درخواست
منگل کو چیف جسٹس آف پاکستان کی تقرری کے لیے 26 ویں آئینی ترمیم کے ذریعے تشکیل پانے والی پارلیمان کی خصوصی کمیٹی میں پی ٹی آئی کی حمایت یافتہ سنی اتحاد کونسل کے 3 ارکان کو بھی شامل کیا گیا تھا، ان اراکین میں چیئرمین پی ٹی آئی بیرسٹر گوہر خان، بیرسٹرعلی ظفر اور حامد رضا شامل تھے۔
سیاسی کمیٹی کا فیصلہ ہے اجلاس میں شریک نہیں ہو سکتے، بیرسٹر گوہر خان
پاکستان تحریک انصاف کے چیئرمین بیرسٹرگوہر خان نے میڈیا کے لیے جاری اپنے ایک پیغام میں کہا ہے کہ پی ٹی آئی خصوصی کمیٹی کے اجلاس میں شرکت نہیں کرے گی، یہ پی ٹی آئی کی سیاسی کمیٹی کا فیصلہ ہے کہ ہم شرکت نہیں کر سکتے۔
انہوں نے کہا کہ اسپیکر قومی اسمبلی ایاز صادق نے مجھے بلایا، اس دوران احسن اقبال اور کامران مرتضیٰ بھی شریک تھے، مولانا فضل الرحمان کا بھی پیغام ملا ہے کہ ہم پارلیمانی کمیٹی کے اجلاس میں شریک ہوں لیکن ہم نے سب سے معذرت کر لی ہے کہ سنی اتحاد کونسل کے اراکین اجلاس میں شریک نہیں ہوں گے۔
یہ بھی پڑھیں:چیف جسٹس کی تعیناتی کے لیے کمیٹی: ن لیگ، پیپلزپارٹی، جے یو آئی اور پی ٹی آئی نے نام دیدیے
واضح رہے کہ پارلیمان کی خصوصی کمیٹی کا اجلاس منگل کی شام شروع ہونے کے بعد اس وقت ملتوی کردیا گیا تھا جب سنی اتحاد کونسل کے تینوں ارکان اجلاس میں شریک نہیں ہوئے، جس پرکمیٹی سنی اتحاد کونسل کے اراکین کو اجلاس میں شرکت کے لیے راضی کرنے اور بات چیت کے لیے 4 رکنی کمیٹی تشکیل دینے کے بعد اجلاس رات ساڑھے 8 بجے تک ملتوی کر دیا تھا۔
پارلیمان کی خصوصی کمیٹی کی جانب سے تشکیل دی گئی کمیٹی نے تینوں ارکان سے رابطہ کرکے انہیں راضی کرنے کی کوشش کی تاہم میڈیا رپورٹس کے مطابق اجلاس میں شرکت کے لیے تنیوں اراکین نے دو ٹوک اور حتمی فیصلہ کرتے ہوئے اجلاس میں شرکت کے لیے معذرت کر لی ہے۔
مزید پڑھیں:تحریک انصاف نے چیف جسٹس تقرری کی پارلیمانی کمیٹی کا بائیکاٹ کیوں کیا؟ اندرونی کہانی سامنے آگئی
واضح رہے کہ اس سے قبل جمعیت علمائے اسلام(جے یو آئی) کے سربراہ مولانا فضل الرحمان نے پاکستان تحریک انصاف (پی ٹی آئی) کے سینیئر رہنما اسد قیصر سے رابطہ کر کے چیف جسٹس آف پاکستان کی تقرری کے لیے پارلیمان کی خصوصی کمیٹی کے اجلاس میں شرکت کی درخواست کی ۔
