وزیراعظم شہباز شریف نے کہا ہے کہ سمندر پار پاکستانی قیمتی اثاثہ ہیں جن کے ذریعے اربوں ڈالرز کا قیمتی زرمبادلہ ملک میں آتا ہے، سمندر پار پاکستانی ملکی تشخص اجاگر کرنے میں بھی اپنا کردار ادا کریں۔
جمعرات کے روز وزیراعظم شہباز شریف سے بیرون ملک پاکستانی مشنز میں نئے تعینات ہونے والے کمیونٹی و لیبر ویلیفئر اتاشیوں نے ملاقات کی۔
یہ بھی پڑھیں: 2 برسوں میں 7 ہزار افراد کو بذریعہ بیورو بیرون ملک ملازمت ملی، وزارت برائے سمندر پار پاکستانی
ملاقات میں وزیر اعظم کے معاون خصوصی طارق فاطمی ، وزیراعظم کے کوآرڈینیٹر رانا احسان افضل ، اور متعلقہ اعلیٰ سرکاری افسران نے شرکت کی ۔
ملاقات میں افسران نے وزیراعظم کو اپنے متعلقہ اسٹیشنز کے حوالے سے اپنے لائحہ عمل سے آگاہ کیا، وزیراعظم نے اتاشیوں کے لیے نیک خواہشات کا اظہار کیا۔
اس موقع پر وزیراعظم شہباز شریف نے کہا کہ سمندر پار کمیونٹی و لیبر ویلیفئر کے افسران سے خطاب میں کہا کہ مجھے اطمینان ہے کہ آپ لوگوں کا تقرر ایک انتہائی شفاف عمل کے ذریعے ہوا ہے، بیرون ملک مقیم پاکستانی کمیونٹی کی فلاح و بہبود آپ کی اولین ترجیح ہونی چاہیے۔
یہ بھی پڑھیں: نادرا نے سمندر پار پاکستانیوں کی کون سی بڑی مشکل آسان بنا دی؟
شہباز شریف نے کہا کہ سمندر پار پاکستانی ہمارا اثاثہ ہیں جن کی بدولت اربوں ڈالرز کا قیمتی زرمبادلہ پاکستان پہنچتا ہے، سمندر پار پاکستانی پاکستان کے مفادات کو ہمیشہ ملحوظ خاطر رکھیں اور ملکی تشخص اجاگر کرنے کے لیے بھرپور کوشش کریں۔
وزیراعظم نے کمیونٹی و لیبر ویلیفئر کے افسران کو ہدایت کی کہ وہ سمندر پار پاکستان سے ہنر مند افرادی قوت کے لیے روزگار کے مواقع تلاش کرنے کی بھرپور کوشش کریں، اور پاکستان میں کاروبار اور سرمایہ کاری لانے کے حوالے سے بھی مواقع تلاش کریں۔
