پاکستان کی جانب سے لبنان کی عوام کے ساتھ وابستگی کے لیے آج تیسری امدادی کھیپ لبنان کے لیے روانہ کردی گئی ہے۔ انسانی بنیادوں پر امدادی اشیاء میں ہنگامی پناہ گاہ کا سامان، ضروری خوراک کا سامان، خشک دودھ، موسم سرما کے کپڑے، کمبل اور ادویات شامل ہیں۔
دفتر خارجہ کے مطابق وزیر اعظم شہباز شریف کی ہدایت پر قدرتی آفات سے نمٹنے کے لیے قومی ادارے (این ڈی ایم اے) نے فلسطین اور غزہ کے لیے انسانی بنیادوں پر بھیجی جانے والی امداد کا عمل تیز کردیا ہے اور اسی حوالے سے اتوار کو پاکستان سے پہلا زمینی وفد بھی روانہ ہوگیا ہے۔
مزید پڑھیں: سعودی عرب کا پہلا طیارہ لبنانی عوام کے لیے امدادی سامان لیکر بیروت پہنچ گیا
سرکاری ذرائع ابلاغ کے مطابق نیشنل لاجسٹکس کوآپریشن کا پہلا زمینی وفد فلسطین اور لبنان کے عوام کے لیے امدادی سامان لیے اتوار کو روانہ ہوا۔ پاکستان کی جانب سے اب تک غزہ اور لبنان کے متاثرین کے لیے 1598 ٹن سے زائد امدادی سامان بھیجا جا چکا ہے۔
واضح رہے وزیراعظم نے امدادی سامان کی ترسیل کی رفتار تیز کرنے اور آگاہی مہم کو چلانے کی ہدایت کرتے ہوئے اپیل کی تھی کہ پاکستانی عوام بالخصوص صاحب ثروت افراد بڑھ چڑھ کر وزیراعظم ریلیف فنڈ برائے غزہ و لبنان میں عطیات جمع کروائیں۔
