پاکستانی نژاد عمیر بٹ تیسری مرتبہ بیلجیم کرکٹ فیڈریشن کے چیئرمین منتخب ہوگئے ہیں، پاکستان کرکٹ بورڈ (پی سی بی) کے چیئرمین محسن نقوی نے عمیر بٹ کو دوبارہ منتخب ہونے پر مبارکباد دی ہے۔
یہ بھی پڑھیں:محسن نقوی کا دورہِ قذافی اسٹیڈیم، 50فیصد اپ گریڈیشن مکمل
چیئرمین پی سی بی نے عمیر بٹ کے عزم اور پیشہ ورانہ صلاحیتوں کو سراہتے ہوئے کہا ہے کہ عمیر بٹ کے پیشہ ورانہ طرز عمل نے بیلجیئم کرکٹ فیڈریشن کے اراکین کو اعتماد دلانے میں اہم کردار ادا کیا ہے۔
انہوں نے کہا کہ مسلسل تیسری مدت کے لیے چیئرمین منتخب ہونا ایک اہم کامیابی اور اعزاز کی بات ہے ، یہ عمیر بٹ کی لگن اور قیادت کا منہ بولتا ثبوت ہے۔ بیلجیئم میں کرکٹ کی ترقی اور فروغ میں ان کی خدمات قابل ستائش ہیں۔
مزید پڑھیں: چیمپیئنز ٹرافی کے لیے اسٹیڈیمز کی اپ گریڈیشن جاری، آئی سی سی وفد 10 نومبر کو دورہ کرےگا
چیئرمین پی سی بی نے عمیر بٹ کے لیے نیک خواہشات کا اظہار کرتے ہوئے امید ظاہر کی کہ وہ بیلجیئم میں کھیل کے فروغ میں اہم کردار ادا کرتے رہیں گے۔
پاکستان کرکٹ بورڈ کرکٹ کی عالمی ترقی میں کردار ادا کرنے والے افراد کی کامیابیوں کو ہمیشہ قدر کی نگاہ سے دیکھتا ہے اور کھیلوں تک رسائی کو مضبوط بنانے میں ایسی قیادت کی اہمیت کو تسلیم کرتا ہے۔
