کراچی کے صنعتی علاقے سائٹ اے ایریا میں غیرملکیوں اور مقامی سیکیورٹی گارڈز کے درمیان جھگڑے میں 2 چینی باشندے زخمی ہوگئے ہیں، وزیر داخلہ سندھ نے پولیس حکام کو واقعہ کی انکوائری کا حکم دیدیا ہے۔
یہ بھی پڑھیں:پاکستان میں چینی باشندوں پر کون کون سے بڑے حملے ہو چکے ہیں؟
ذرائع کے مطابق سیکیورٹی گارڈز نے مبینہ طور پر چینی باشندوں سے تکرار کے بعد فائرنگ کرکے ایک چینی کو زخمی کردیا ہے، پولیس کے مطابق دونوں زخمیوں کو لیاقت نیشنل اسپتال منتقل کرتے ہوئے تفتیش کا آغاز کردیا گیا ہے۔
BREAKING
A security guard at a Karachi factory shot and injured two Chinese nationals following a heated argument.
One of the injured chinese citizen is in critical condition, according to a spokesperson of Liaquat National Hospital.
— Naimat Khan (@NKMalazai) November 5, 2024
دونوں زخمی چینی شہریوں کو لیاقت نیشنل اسپتال لے جایا گیا ہے جہاں ڈاکٹرز کی ٹیم معائنہ کر رہی ہے، تاہم ایک زخمی کی حالت تشویشناک بتائی گئی ہے، جسے آپریشن تھیٹر میں طبی امداد دی جارہی ہے۔
ترجمان لیاقت نیشنل اسپتال ڈاکٹر امجد رضوی کے مطابق زخمی چینی باشندوں کے علاج معالجہ کی غرض سے ڈاکٹرز کی ٹیم تشکیل دے دی گئی ہے، جو ان کے علاج کے لیے ہر ممکن کوشش کرےگی۔
مزید پڑھیں:اسلام آباد: ڈکیتی کے دوران مزاحمت پر زخمی ہونے والا چینی شہری چل بسا
وزیر داخلہ سندھ ضیاء الحسن لنجار نے ڈی آئی جی کراچی پولیس ساؤتھ سے تفصیلات طلب کرلیں، محکمہ داخلہ کے اعلامیہ کے مطابق وزیر داخلہ نے جامع انکوائری کرکے دیگر حقائق کا پتا لگانے کی ہدایت کرتے ہوئے انکوائری رپورٹ سمیت پولیس کاروائی سے آگاہ کرنے کا حکم دیا ہے۔
وزیر داخلہ سندھ ضیا الحسن لنجار نے واقعہ میں ملوث سیکیورٹی گارڈ کی گرفتاری کی ہدایات جاری کرتے ہوئے چینی ماہرین اور باشندوں سمیت غیرملکیوں کو سیکیورٹی فراہم کرنیوالی کمپنیوں کے آڈٹ کا بھی حکم دیا ہے۔
مزید پڑھیں: کراچی میں چینی باشندوں پر حملہ، خودکش بمبار سے متعلق اہم تفصیلات سامنے آگئیں
صوبائی محکمہ داخلہ کے اعلامیہ کے مطابق وزیر داخلہ نے سیکیورٹی جیسے اہم فرائض پر مامور گارڈز کے جسمانی و دماغی فٹنس ٹیسٹ کو یقینی بنانے اور ان کے ذہنی اور جسمانی ٹیسٹ کے حوالے سے سیکیورٹی کمپنیز کو پابند کرنے کی بھی ہدایت کی ہے۔
’تربیت یافتہ اور مکمل طور فٹ سیکیورٹی گارڈ ہی سے خدمات لی جائیں اور سیکیورٹی کمپنیوں کے آڈٹ پر مشتمل رپورٹ برائے ملاحظہ ارسال کی جائے، غیر رجسٹرڈ اور غیر قانونی سیکیورٹی کمپنیوں کے خلاف کریک ڈاؤن کیا جائے۔‘
دوسری جانب ترجمان لیاقت نیشنل اسپتال کے مطابق سائیٹ کے علاقہ میں زخمی ہونیوالے چینی باشندوں کو آئی سی یو شفٹ کردیا گیا ہے اور ان کے سی ٹی اسکین اور دیگر ٹیسٹ کر لیے گئے ہیں۔
’ڈاکٹرز کی ٹیم زخمیوں کی رپورٹ مرتب کر رہی ہے، جس کے بعد ہی غیرملکی باشندوں کی صحت کے حوالے سے آگاہ کیا جائےگا۔‘
واضح رہے کہ کراچی کے اسی علاقے میں 2021 میں چینی انجینیئرز کو لے جانے والی گاڑی پر نامعلوم افراد کی فائرنگ سے ایک انجینئر زخمی ہو گیا تھا۔
4 سیکیورٹی سپروائزرز کی غفلت اور لاپرواہی سامنے آئی ہے، ڈی آئی جی ساؤتھ
دوسری جانب ڈی آئی جی ساؤتھ اسد رضا نے کہاکہ 4 سیکیورٹی سپروائزرز کی غفلت اور لاپرواہی سامنے آئی ہے، 8 بج کر 4 منٹ پر واقعہ ہوا اور پولیس کو 8 بجکر 40 منٹ پر اطلاع دی گئی، غیر ملکیوں کی سیکیورٹی سے متعلق ایس او پیز کی خلاف ورزی کی گئی ہے۔
انہوں نے کہاکہ ابتدائی معلومات کے مطابق واقعہ جھگڑے کے دوران پیش آیا، تاہم جس جگہ پر واقعہ ہوا وہاں سی سی ٹی وی کیمرے نصب نہیں تھے۔
ڈی آئی جی ساؤتھ کے مطابق فیکٹری میں دو طرح کی سیکیورٹی موجود ہے، فیکٹری میں ایک اپنی اور ایک نجی سیکیورٹی کمپنی ہے، موقع سے 4 سیکیورٹی گارڈز کو حراست میں لیا گیا ہے۔
انہوں نے کہاکہ سیکیورٹی گارڈز کے آبائی علاقے میں بھی ملزم کو تلاش کیا جائے گا، سائیٹ فیکٹری میں زخمی غیر ملکی باشندوں کو آئی سی یو شفٹ کردیا گیا ہے۔
مزید پڑھیں: چینی انجینیئرز پر حملہ: ٹوٹا موبائل کس طرح حملہ آوروں تک پہنچنے میں مددگار ثابت ہوا؟
ڈی آئی جی نے کہاکہ دونوں باشندوں کے سٹی اسکین اور دیگر ٹیسٹ کر لیے گئے ہیں، زخمیوں کی رپورٹ مرتب کی جارہی ہے، ڈاکٹرز کی رپورٹ کے بعد غیر ملکی باشندوں کی صحت کے حوالے سے آگاہ کیا جائے گا۔
