بلوچستان کے علاقے خضدار کی تحصیل سوراب میں کمشنر قلات ڈویژن کے قافلے میں شامل لیوی کی گاڑی کو خوفناک حادثہ پیش آیا ہے جس کے نتیجے میں 4 لیویز اہلکار جاں بحق اور 2 زخمی ہوگئے ہیں۔
اسٹیشن ہیڈ آفیسر (ایس ایچ او) سوراب منیر عالم جتک کے مطابق حادثے میں کمشنر قلات ڈویژن داؤد خلجی محفوظ رہے۔
حادثہ کمشنر قلات ڈویژن کے قافلے کی مخالف سمت سے آنے والے ٹرالر کی ٹکر کے باعث پیش آیا۔
حادثے کے فوراً بعد امدادی ٹیمیں جائے حادثہ پر پہنچ گئیں اور جاں بحق اہلکاروں کی لاشوں اور زخمیوں کو ڈسٹرکٹ ہیڈکوارٹر اسپتال ( ڈی ایچ کیو) خضدار منتقل کیا گیا جہاں زخمیوں کی حالت خطرے سے باہر بتائی جارہی ہے۔
انتظامیہ کے مطابق جاں بحق لیویز اہلکاروں کی لاشیں ضروری کارروائی کے بعد ورثاء کے حوالے کر دی جائیں گی۔
