جمعیت علما اسلام (ف) کے سربراہ مولانا فضل الرحمان نے کہا ہے کہ عمران خان کی رہائی فی الحال ممکن نظر نہیں آتی، تاہم ملکی سیاست میں کسی بھی وقت تبدیلی آسکتی ہے۔
لندن میں گفتگو کرتے ہوئے انہوں نے کہاکہ عمران خان سے کسی ڈیل کا علم نہیں، سنی سنائی باتوں پر تبصرہ نہیں کرسکتا، مظاہرے اور جلسے پی ٹی آئی کا حق ہے، اس سے ان کو نہیں روکنا چاہیے۔
یہ بھی پڑھیں کیا مولانا فضل الرحمان جیل میں عمران خان سے ملاقات کرنے والے ہیں؟
انہوں نے کہاکہ بشریٰ بی بی اور عمران خان کی بہنوں کی ضمانت میں میرا کوئی کردار نہیں ہے۔
سربراہ جے یو آئی نے کہاکہ 26ویں آئینی ترمیم سے متعلق مذاکرات کے بعد اپوزیشن کو ریلیف ضرور ملا، دورہ برطانیہ پر نواز شریف سے ملاقات طے نہیں، لیکن ہو بھی جاتی ہے تو کوئی مضائقہ نہیں۔
انہوں نے کہاکہ ہم عوام میں جارہے ہیں، نومبر کے آخر میں سکھر اور 8 دسمبر کو پشاور میں جلسہ کریں گے، ہمارے جلسوں کے بعد ملین مارچ تو بس ایک نام رہ جائے گا۔
انہوں نے مزید کہاکہ مسئلہ کشمیر کے حل کے لیے کشمیریوں کو اب خود ہی کچھ کرنا ہوگا۔
یہ بھی پڑھیں نئی قانون سازی 26ویں آئینی ترمیم کی توہین، عدالت میں چیلنج کریں گے، مولانا فضل الرحمان
واضح رہے کہ جمعیت علما اسلام (ف) کے سربراہ نجی دورے پر لندن میں ہیں، جہاں ان کے ساتھ پارٹی کے دیگر رہنما بھی موجود ہیں۔
