بلوچستان کے ضلع ہرنائی میں سیکیورٹی فورسز کے آپریشن کے دوران 2 جوان شہید اور 3 دہشتگرد ہلاک ہو گئے ہیں۔
یہ بھی پڑھیں:وفاقی اور بلوچستان حکومت کا دہشتگردوں کا سر کچلنے کے لیے ہر ممکن اقدامات کا فیصلہ
پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق 14 نومبر 2024 کو ضلع ہرنائی میں معصوم شہریوں کو نشانہ بنانے کی منصوبہ بندی کرنے والے دہشتگردوں کی مبینہ موجودگی پر میجر محمد حسیب کی سربراہی میں سیکیورٹی فورسز کو فوری طور پر آپریشن کے لیے متحرک کیا گیا تھا۔
بیان میں مزید کہا گیا ہے کہ ’فوجی جوانوں نے دہشتگردوں کے ٹھکانے کو مؤثر طریقے سے نشانہ بنایا اور اس کے نتیجے میں 3 دہشتگردوں کو ہلاک کر دیا گیا ہے۔
مزید پڑھیں:کیچ: سیکیورٹی فورسز کا آپریشن، خودکش بمباروں کے ریکروٹنگ ایجنٹ سمیت 4 دہشتگرد ہلاک
تاہم آپریشن کے دوران دہشتگردوں نے سیکیورٹی فورسز کی گاڑی پر دیسی ساختہ بم حملہ کیا جس کے نتیجے میں 28 سالہ میجر محمد حسیب، جو اپنے ساتھی فوجی جوانوں کی قیادت کر رہے تھے، نے 38 سالہ حوالدار نور احمد کے ساتھ بہادری سے لڑتے ہوئے شہادت کو گلے لگا لیا۔
بیان میں مزید کہا گیا کہ پاکستان کی سیکیورٹی فورسز قوم کے شانہ بشانہ بلوچستان کے امن، استحکام اور ترقی کو سبوتاژ کرنے کی کوششوں کو ناکام بنانے کے لیے پرعزم ہیں اور ہمارے بہادر جوانوں کی ایسی قربانیاں ہمارے عزم کو مزید تقویت دیتی ہیں۔
ملک خاص طور پر بلوچستان اور کے پی میں حال ہی میں سیکیورٹی فورسز، قانون نافذ کرنے والے دیگر اداروں اور سیکیورٹی چوکیوں کو نشانہ بنانے والے حملوں کی تعداد میں تیزی سے اضافہ دیکھا گیا ہے۔
یہ بھی پڑھیں:شمالی وزیرستان: سیکیورٹی فورسز نے فتنہ الخوارج کے 8 دہشتگرد ہلاک کردیے
ایک روز قبل بھی سیکیورٹی فورسز نے بلوچستان کے ضلع کیچ میں فائرنگ کے تبادلے کے دوران 4 دہشت گردوں کو ہلاک کر دیا تھا۔ اسی روز خیبر پختونخوا کے ضلع میران شاہ میں ایک اور کارروائی میں سیکیورٹی فورسز نے 8 دہشتگردوں کو ہلاک کر دیا تھا۔
