وزیراعلیٰ خیبرپختونخوا علی امین گنڈاپور وزیراعظم شہباز شریف کی جانب سے بلائی گئی ایپکس کمیٹی میں شریک ہوں گے۔ اس کمیٹی میں آرمی چیف، ڈی آئی ایس آئی، ایم آئی اور آئی بی کے سربراہان، وزرائے اعلیٰ اور بعض وفاقی وزرا بھی شریک ہوں گے۔
انگریزی روزنامے ’دی نیوز‘ میں شائع ایک رپورٹ کے مطابق، وزیراعلیٰ خیبرپختونخوا علی امین گنڈا پور ایپکس کمیٹی کے اجلاس میں اعلیٰ عسکری قیادت کے ساتھ پاکستان تحریک انصاف (پی ٹی آئی) کے 24 نومبر کے احتجاجی مارچ اور عمران خان اور پی ٹی آئی کی اسٹیبلشمنٹ کے ساتھ جاری کشیدگی پر بات چیت کے لیے مکمل طور پر تیار ہوگئے ہیں۔
یہ بھی پڑھیں: احتجاج کی تیاری مکمل، واپسی تب ہوگی جب مطالبات پورے ہوں گے، علی امین گنڈاپور
رپورٹ کے مطابق، وزیراعظم شہباز شریف نے ایپکس کمیٹی کا اجلاس آج (پیر) کو طلب کیا ہے، تاہم وزیراعلیٰ خیبرپختونخوا علی امین گنڈاپور نے کہا ہے کہ اجلاس منگل کو منعقد ہوگا۔ ایک سوال کے جواب میں علی امین گنڈاپور نے کہا کہ احتجاجی مارچ کے لیے کسی کی اجازت کی ضرورت نہیں تاہم اگر امن عامہ کی صورتحال اور نیشنل ایکشن پلان پر بات ہوئی تو عمران خان اور پی ٹی آئی کو درپیش صورتحال پر بات ہوگی۔
وزیر اعلیٰ خیبر پختونخوا نے کہا کہ وہ ان معاملات پر ایپکس کمیٹی میں بات کریں گے، گزشتہ اجلاسوں میں بھی ان مسائل پر بات کرتا رہا ہوں۔ وزیراعلیٰ نے امن و امان کی بگڑتی صورتحال پر بھی تحفظات کا اظہار کیا اور کہا کہ پی ٹی آئی اور اسٹیبلشمنٹ کے درمیان جاری کشید گی پی ٹی آئی اور ملک کے مفاد میں نہیں۔ انہوں نے کہا کہ ایسے مسائل کو حل کرنے کی ضرورت ہے، دہشتگردی کے خلاف جنگ میں فوج اور قانون نافذ کرنے والے اداروں کی قربانیوں کا احترام ہے۔
یہ بھی پڑھیں: علی امین گنڈاپور عمران خان کی مرضی سے کمپرومائزڈ ہیں، خواجہ آصف
میڈیا رپورٹس کے مطابق، ایپکس کمیٹی میں موجودہ ملکی سلامتی کی صورتحال اور دیشتگردی کے خلاف حکومتی اقدامات پر تبادلہ خیال کیا جائے گا۔ سیکیورٹی ایجنسیوں کے لیے دہشتگردی کے واقعات میں اضافہ باعث تشویش ہے، یہی وجہ ہے کہ ایپکس کمیٹی کے اجلاس میں پی ٹی آئی احتجاج کے حوالے سے بات کی جائے گی۔
