صدر مملکت آصف علی زرداری نے کہا ہے کہ معذوری کے حامل افراد کے حقوق اور فلاح و بہبود کے فروغ کے لیے آج خصوصی افراد کا عالمی دن منا رہے ہیں۔ خصوصی افراد کی استقامت، ہمت اور قابل قدر کردار کا اعتراف کرتے ہیں۔ زندگی کے تمام شعبوں میں خصوصی افراد کی شرکت یقینی بنانے کے لیے پرعزم ہیں۔
صدر آصف علی زرداری نے معذوری کے حامل افراد کے عالمی دن پر اپنے اہم پیغام میں کہا ہے کہ معاون ٹیکنالوجی اور عوامی مقامات تک خصوصی افراد کی رسائی بڑھانے کی ضرورت ہے۔ خصوصی افراد کے لیے سازگار قانونی، سماجی اور معاشی حالات پیدا کرنا ہوں گے۔
مزید پڑھیں: کوئٹہ: معذوری اور مفلسی سے تنگ فنکار نے بچے فروخت کرنے کا فیصلہ کرلیا
صدر مملکت نے کہا کہ خصوصی افراد کو معیاری تعلیم، ہنر اور صحت کی سہولیات فراہم کرنا ضروری ہے۔ خصوصی افراد کو قابلیت کی بنیاد پر روزگار فراہم کرنا ہوگا۔ ایسا معاشرہ تشکیل دینا ہے جہاں خصوصی افراد کے ساتھ عزت کا برتاؤ کیا جائے۔ خصوصی افراد کی ترقی کے لیے انہیں ضروری وسائل مہیا کیے جائیں۔
صدر کا کہنا تھا کہ پاکستان میں خصوصی افراد کو با اختیار بنانے کے لیے اقدامات لیے گئے ہیں۔ خصوصی افراد کے حقوق کے لیے کونسل کا قیام انہیں درپیش چیلنجز سے نمٹنے کی جانب اہم قدم ہے۔ کونسل خصوصی افراد کے حقوق، بہبود کے لیے پالیسیوں کی تشکیل، نفاذ اور آگاہی میں مرکزی ادارے کا کام کرے گی۔
مزید پڑھیں: معذور افراد کو مفت پک اینڈ ڈراپ سروس دینے والا رکشہ ڈرائیور
صدر مملکت کا کہنا تھا کہ پاکستان کو خصوصی افراد کے لیے خصوصی تعلیم و تربیت کی اہمیت کا مکمل ادراک ہے۔ خصوصی افراد کے لیے تعلیمی مراکز، پیشہ ورانہ تربیتی اداروں کا ملک گیر نیٹ ورک تیار کیا گیا ہے۔ خصوصی افراد کو معاشرے کا کارآمد ممبر بنانے کے لیے ضروری مہارتوں اور تعلیم سے آراستہ کیا جائے گا۔ سرکاری ملازمتوں میں خصوصی کوٹہ کے نفاذ سے معذوری کے حامل افراد کو روزگار تک رسائی حاصل ہوگی۔
