وزیراعظم محمد شہباز شریف نے کہا ہے کہ انسداد بدعنوانی کے عالمی دن پر تمام پاکستانیوں سے اپیل کرتا ہوں کہ وہ بدعنوانی سے پاک مستقبل کے لیے ہماری جدوجہد میں اپنا کردار ادا کریں۔ آئیے ہم ایک ساتھ کھڑے ہوں، ایک ایسا پاکستان بنانے کے اپنے عزم میں متحد ہو جائیں جہاں عوامی وسائل کو ہمارے لوگوں کی فلاح و بہبود کے لیے مؤثر طریقے سے استعمال کیا جائے۔ آئیے ایک ایسے مستقبل کے لیے مل کر کام کریں جہاں قانون کی حکمرانی ہو اور جہاں ’احتساب سب کے لیے‘ بنیاد ہو۔
وزیراعظم محمد شہباز شریف نے انسداد کرپشن کے عالمی دن کے موقع پر اپنے پیغام میں کہا ہے کہ 9 دسمبر کو انسداد بدعنوانی کا عالمی دن منایا جاتا ہے، جو ہم سب کو اپنے معاشروں کو درپیش بدعنوانی کا مقابلہ کرنے کی عالمی کوششوں کی یاد دہانی ہے۔ اس سال کے عالمی دن کا موضوع ’بدعنوانی کے خلاف نوجوانوں کے ساتھ متحد ہونا: کل کی سالمیت کی تشکیل‘ بجا طور پر اس اہم کردار کو اجاگر کرتا ہے جو ہمارے نوجوان بدعنوانی کے خلاف جنگ میں ادا کر سکتے ہیں۔ ہماری نوجوان نسل ایک ایسے مستقبل کی مستحق ہے جو کرپشن سے پاک ہو۔
مزید پڑھیں: چیئرمین نیب کا کرپشن کے خاتمہ کے لیے اجتماعی کوششوں پر زور
ان کا کہنا تھا کہ پاکستان آج بین الاقوامی برادری کے ساتھ مل کر اس عہد کی تجدید کرتا ہے کہ اپنی آنے والی نسلوں کے لیے شفاف، مربوط اور جوابدہ معاشرے کے قیام کے لیے اپنی کوششیں جاری رکھیں گے۔ کرپشن اور بدعنوانی ایک ایسا گھناؤنا عنصر ہے جو کسی بھی ملک کی معاشی ترقی کو نقصان پہنچاتا ہے اور معاشرے کے سماجی تانے بانے کو تباہ کر دیتا ہے۔
وزیر اعظم نے کہا کہ یہ قوموں کو ان کی صلاحیتوں سے محروم کرتا ہے اور لوگوں کو منصفانہ حکمرانی اور مساوی مواقع کے فوائد سے لطف اندوز ہونے سے روکتا ہے۔ یہ عوامی خدمات کی فراہمی کو بھی بری طرح متاثر کرتا ہےکیونکہ ترقی کے لیے دستیاب وسائل صحیح طور پر استعمال نہیں ہو پاتے۔ اسی وجہ سے معاشرے میں۔ عدم مساوات پیدا ہوتی ہے جو عام شہریوں کی زندگیوں کو متاثر کرتی ہے۔ بدعنوانی حکومتوں اور اس کے شہریوں کے درمیان عدم اعتماد کی ایک بڑی وجہ ہے۔
مزید پڑھیں: کرپشن اسکینڈل میں پلی بارگین؛ نیب نے ساڑھے 3 کروڑ روپے سے زائد رقم پنجاب حکومت کے سپرد کردی
شہباز شریف نے کہا کہ ہماری حکومت ہر سطح پر بدعنوانی کو جڑ سے اکھاڑ پھینکنے کے لیے پرعزم ہے۔ قومی احتساب بیورو (نیب) اور دیگر قانون نافذ کرنے والے ادارے اس بات کو یقینی بنانے کے لیے انتھک محنت کر رہے ہیں کہ جو لوگ طاقت کا غلط استعمال کرتے ہیں اور عوام کی محنت سے کمائی گئی آمدنی کو لوٹتے ہیں انہیں اپنے اعمال کے نتائج کا سامنا کرنا پڑتا ہے۔ ہم اپنے اداروں کی محنت کی ستائش کرتے ہیں اور معاشرے سے بدعنوانی کو جڑ سے اکھاڑ پھینکنے کے اس اہم کام میں ان کے ساتھ کھڑے ہیں۔
وزیراعظم پاکستان نے کہا کہ حکومت اکیلے کرپشن کے خلاف جنگ نہیں جیت سکتی۔ اس کے لیے ہر شہری، ہر کمیونٹی اور ہر ادارے کی اجتماعی کوششوں کی ضرورت ہے۔ بدعنوانی کو بے نقاب کرنے میں میڈیا کا فعال کردار ہے۔ یہ دن انصاف اور دیانت پر یقین رکھنے والے تمام لوگوں سے فعال شرکت کا مطالبہ کرتا ہے۔ شفاف اور جوابدہ معاشرے کی تعمیر ہم میں سے ہر فرد کی ذمہ داری ہے۔
