ٹالی ووڈ کے مشہور اداکار الو ارجن جنہیں حیدرآباد تھیٹر میں بھگدڑ کیس میں عدالت نے 14 دن کی عدالتی تحویل میں بھیجا تھا، ہفتہ کی صبح جیل سے باہر آگئے۔ تلنگانہ ہائیکورٹ نے جمعہ کو ان کی فلم ’پشپا 2: دی رول‘ کے پریمیئر کے دوران ہونے والی بھگدڑ کے سلسلے میں عبوری ضمانت دے دی تھی۔ واضح رہے کہ بھگدڑ میں ایک خاتون کی موت ہوگئی تھی۔ اداکار کو ہائیکورٹ سے ریلیف ملنے کے باوجود رات جیل میں گزارنا پڑی، کیونکہ جیل حکام کو دیر تک ضمانت کی کاپی نہیں ملی تھی۔
ہائی پروفائل گرفتاری کے بعد تلنگانہ میں برسراقتدار کانگریس کو بی جے پی اور بی آر ایس نے تنقید کا نشانہ بنایا۔ وہیں حکومت نے بی جے پی کو جواب دیتے ہوئے کہا کہ قانون سب کے لیے برابر ہے۔ دریں اثنا تلنگانہ کے وزیر اعلیٰ ریونت ریڈی نے بھی نئی دہلی میں آج تک کے ایک پروگرام میں کہا کہ قانون سب کے لیے یکساں ہے۔ کوئی بھی اس عورت کے بارے میں بات نہیں کر رہا ہے جس کی موت ہوئی ہے یا اس کے بیٹے کے بارے میں جو کوما میں ہے۔ جب وہ کوما سے بیدار ہوگا تو اس کی ماں نہیں ہوگی۔
مزید پڑھیں: ’پشپا 2‘ کے ہیرو الو ارجن کو پولیس نے گرفتار کرلیا
اس سے قبل، ڈرامائی حالات میں پولیس نے الو ارجن کو گرفتار کیا تھا۔ اس دوران جب پولیس اداکار کی رہائش گاہ پر پہنچی انہیں پولیس اہلکار سے مبینہ طور پر بحث کرتے ہوئے اور ان کے سونے کے کمرے میں آنے پر اعتراض کرتے ہوئے دیکھا گیا۔ انہیں یہ کہتے ہوئے سنا گیا تھا کہ یہ یقینی طور پر اچھی بات نہیں ہے۔
اس کے بعد پولیس گاڑی میں چکڈپلی تھانے لے جایا گیا اور پھر نامپلی عدالت میں پیش کیا گیا جہاں انہیں 14 دن کی عدالتی حراست میں بھیج دیا گیا۔ انہیں سخت سیکیورٹی میں جیل منتقل کیا گیا تھا۔ الو ارجن کو گرفتاری کے چند گھنٹے بعد ہی ہائیکورٹ سے ضمانت بھی مل گئی تھی لیکن چونکہ ضمانت کی کاپی بروقت پولیس کو نہیں مل سکی، اس لیے انہیں ایک رات جیل میں کاٹنا پڑی۔
مزید پڑھیں: بھارت میں پشپا 2 کی ’کلر نمائش‘ جاری، الوارجن کا ایک اور مداح چل بسا
جیل سے رہائی کے بعد میڈیا سے گفتگو میں الو ارجن نے کہا کہ پریشانی کی کوئی بات نہیں قانون کی پاسداری کرنیوالا شہری ہوں تعاون کروں گا، انہوں نے مشکل وقت میں مداحوں کی سپورٹ پر ان کا شکریہ بھی ادا کیا اور کہا کہ یہ میرے اور میرے چاہنے والوں کے لیے ایک مشکل وقت تھا۔
الو ارجن نے سندھیا تھیٹر میں بھگڈر مچنے کے معاملے پر افسوس کا اظہار کرتے ہوئے کہا کہ پچھلے 20 برس سے میں اپنے ماموں کیساتھ فلمیں دیکھنے سینما گھروں جاتا رہا ہوں، یہ ہمیشہ سے ہی ایک خوشگوار تجربہ رہا لیکن اس مرتبہ چیزوں نے ایک غیر متوقع رخ لے لیا تھا۔
مزید پڑھیں: پشپا 2 نے آمدنی کے کئی ریکارڈ توڑ دیے
واضح رہے کہ 4 دسمبر کو حیدرآباد کے سندھیا تھیٹر میں بھگدڑ جیسی صورت حال کے دوران ایک 35 سالہ خاتون کی موت ہوگئی اور اس کے 8 سالہ بیٹے کو اسپتال میں داخل کرایا گیا۔ یہ واقعہ اس وقت پیش آیا جب ہزاروں مداح اداکار کی پریمیئر میں ایک جھلک دیکھنے کے لیے جمع ہو گئے اور بھیڑ بے قابو ہو گئی۔
واقعے کے بعد، سٹی پولیس نے متوفی خاتون کے خاندان کی شکایت کی بنیاد پر چکڈ پلی پولیس اسٹیشن میں بھارتیہ نیائے سنہتا (بی این ایس) کی مختلف دفعات کے تحت الو ارجن، اس کی سیکیورٹی ٹیم اور تھیٹر انتظامیہ کے خلاف مقدمہ درج کیا تھا۔ ہائیکورٹ نے انہیں 4 ہفتوں کی عبوری ضمانت دی اور کیس کو مزید سماعت کے لیے 21 جنوری 2025 تک ملتوی کردیا۔
