وزیراعظم شہباز شریف نے کہا ہے کہ نوجوان کسی بھی ملک کی معاشی ترقی کے کلیدی محرک ہیں، حکومت پاکستان کی کوشش ہے کہ نوجوان ملازمتیں ڈھونڈنے کے بجائے ملازمتیں دینے والے بنیں۔
مصر کے دارالحکومت قاہرہ میں ڈی ایٹ سربراہی اجلاس سے خطاب کے ابتدائی کلمات میں وزیراعظم شہباز شریف نے مصر کے صدر عبدالفتاح السیسی اور مصر کی حکومت کو ڈی ایٹ سمٹ سربراہی اجلاس کی میزبانی کرنے پر مبارک باد دی اور کہا کہ وہ قاہرہ پہنچنے پر شاندار استقبال پر بھی صدر عبدالفتاح السیسی کے شکرگزار ہیں۔
یہ بھی پڑھیں: وزیراعظم شہباز شریف ڈی ایٹ سمٹ میں شرکت کے لیے قاہرہ پہنچ گئے
وزیراعظم شہباز شریف نے آذربائیجان کو ڈی ایٹ میں شمولیت پر خوش آمدید کہا وزیراعظم نے کہا کہ انہیں یقین ہے کہ آذربائیجان، صدرالہام علییوف کی قابل قیادت میں ڈی ایٹ کے مقاصد کے حصول میں اہم کردار ادا کرے گا۔
_PMO Tickers_
پرائم منسٹر آفس
(پریس ونگ)
قاہرہ: 19 دسمبر 2024.
وزیرِاعظم محمد شہباز شریف ترقی پذیر ممالک (D-8) کے سربراہی اجلاس میں شرکت کیلئے مصر کے شاہی محل پہنچ گئے ہیں. pic.twitter.com/zSWowZfFsV— نوید جان (@naveed786z) December 19, 2024
وزیراعظم نے کہا کہ نوجوان اور چھوٹے اور درمیانے درجے کے کاروبار، معاشی ترقی کے کلیدی محرک ہیں، نوجوان توانائی، نئے خیالات، اور تخلیقی صلاحیتوں سے بھرپور ہیں،یس ایم ایز ملازمتیں پیدا کرتے ہیں، اختراع کو فروغ دیتے ہیں مقامی کاروبار کو فروغ دیتے ہیں۔
شہباز شریف نے کہا کہ نوجوانوں میں سرمایہ کاری اور چھوٹے اور درمیانے درجے کے کاروباروں کی جانب رجحان کا فروغ ہماری سماجی و اقتصادی ترقی کے لیے انتہائی اہمیت کا حامل ہے، پاکستان کی آبادی کے 60 فیصد سے زیادہ حصہ 30 سال سے کم عمر افراد پر مشتمل ہے جو کہ جدت اور ترقی میں اہم کردار ادا کرسکتے ہیں،کوشش ہے کہ نوجوان ملازمتیں ڈھونڈنے کے بجائے ملازمتیں دینے والے بنیں۔
یہ بھی پڑھیں: وزیراعظم شہباز شریف کا ’ون واٹر سمٹ‘ میں شرکت کے لیے دورہ سعودی عرب کا اعلان
انہوں نے کہا کہ حکومت پاکستان اپنے فلیگ شپ یوتھ پروگرام کے ذریعے، معیاری تعلیم فراہم کرنے، روزگار کے مواقع پیدا کرنے اور پیداواری مواقع فراہم کرنے کے لیے پرعزم ہے، 2013 سے اب تک اس پروگرام کے ذریعے لائق اور قابل طالب علموں میں 6 لاکھ سے زائد لیپ ٹاپس تقسیم کیے جاچکے ہیں اور ہزاروں اسکالرشپس دی گئی ہیں، لاکھوں نوجوانوں کومصنوعی ذہانت، ڈیٹا اینالیٹکس، اور سائبر سیکورٹی کے حوالے سے فنی تربیت فراہم کی گئی ہے۔
ان کا کہنا تھا کہ پاکستان دنیا کی سب سے بڑی فری لانسر کی کمیونٹیز میں سے ایک ہے، ہم آئی ٹی کے شعبے میں تربیت پر توجہ مرکوز کر رہے ہیں تاکہ بڑے پیمانے پر اپنے نوجوانوں کو جدید صلاحیتوں سے آراستہ کر سکیں، ڈیجیٹل دنیا کے ساتھ مزید بہتر طرح سے جڑ سکیں اور ملازمتوں کے مزید مواقع فراہم کیے جا سکیں۔
یہ بھی پڑھیں: قاہرہ میں نوجوان صحافیوں کے لیے پہلی ’عرب میڈیا کریئیٹیویٹی سمٹ ‘ کا آغاز
وزیراعظم شہباز شریف نے کہا کہ حکومت پاکستان نے یوتھ بزنس اینڈ ایگریکلچر، لون سکیم کے ذریعے اربوں روپوں کے قرضے دیے ہیں، جس کا مقصد نوجوان پاکستانیوں اپنے پاؤں پر کھڑا کرنا ہے، ہمارے دیگر اقدامات، جیسے کہ، اسٹارٹ اپ پاکستان اور نیشنل انوویشن ایوارڈز کا مقصد ایک امید افزا، اسٹارٹ اپ ماحول کو فروغ دینا اور انکیوبیشن کے مواقع فراہم کرنا ہے۔
انہوں نے کہا کہ گیارہواں ڈی ایٹ سمٹ ایس ایم ایز کے حوالے سے اشتراک کا ایک نادر موقع ہے، مجھے یہ بتاتے ہوئے خوشی ہو رہی ہے کہ ہماری کابینہ نے ڈی ایٹ رکن ممالک کے ساتھ ترجیحی تجارتی معاہدے کے ساتھ ساتھ اس کے پروٹوکول کے نفاذ کی منظوری دے دی ہے۔
’غزہ میں جنگ بندی ضروری ہے‘
وزیراعظم شہباز شریف نے غزہ میں اسرائیلی جارحیت کی شدید الفاظ میں مذمت کی اور کہا کہ غزہ میں فوری جنگ بندی کا مطالبہ کرتے ہیں، غزہ میں جنگ بندی خطے کے امن کے لیے ضروری ہے، غزہ میں امن نہ صرف خطے بلکہ پوری دنیا میں امن کے لیے بھی ضروری ہے۔
انہوں نے کہا کہ مصر کے صدر کی جانب سے اس اجلاس میں غزہ کے معاملے پر خصوصی سیشن رکھنا قابل تعریف ہے، اسی سیشن میں ہم غزہ کے معاملے پر مزید بات کریں گے۔
